ەۋرازيالىق ەكونوميكالىق وداق اياسىنداعى تىيىمدار مەن شەكتەۋلەر جاريا ەتىلدى

استانا. قازاقپارات - كەدەندىك باقىلاۋ اياسىندا تىيىمدار مەن شەكتەۋلەردى ساقتاۋ مەملەكەتتىڭ ۇلتتىق مۇددەسىن قورعاۋدا، تۇرعىنداردىڭ ءومىرى مەن دەنساۋلىعىنىڭ قاۋىپسىزدىگى ءۇشىن ۇلكەن ماڭىزى بار.

 بۇل تۋرالى بۇگىن ق ر ق م مەملەكەتتىك كىرىستەر كوميتەتى كەدەندىك باقىلاۋ باسقارماسىنىڭ باستىعى ەرجان ءابدىراحمانوۆ ايتتى.

ونىڭ اتاپ وتۋىنشە، ەۋرازيالىق ەكونوميكالىق وداق تۋرالى شارتتىڭ 101-بابىنىڭ 3-تارماعىندا تىيىم سالۋلار مەن شەكتەۋلەرگە وداقتىڭ كەدەندىك شەكاراسى ارقىلى وتكىزىلەتىن تاۋارلارعا قاتىستى قولدانىلاتىن تاريفتىك ەمەس رەتتەۋ شارالارى، تەحنيكالىق رەتتەۋ شارالارى، ەكسپورتتىق باقىلاۋ شارالارى جانە اسكەرگە ارنالعان ونىمدەرگە قاتىستى شارالار، سونداي- اق سانيتاريالىق، ۆەتەريناريالىق- سانيتاريالىق جانە كارانتيندى فيتوسانيتاريالىق شارالار جانە رادياتسيالىق تالاپتار جاتاتىنى ايقىندالعان.

«تىيىم سالۋلار مەن شەكتەۋلەردى كەدەندىك باقىلاۋ بولىگىندە قولدانۋ ءارتۇرلى تاۋارلار مەن زاتتاردىڭ زاڭسىز وتكىزىلۋىنىڭ جولىن كەسۋگە باعىتتالعان جانە ولاردى بۇزۋشىلىق قايعىلى سالدارعا اكەلۋى مۇمكىن»، - دەدى ول.

ە. ءابدىراحمانوۆ سونداي- اق كەدەندىك باقىلاۋ اياسىندا تىيىم سالۋلار مەن شەكتەرۋلەردى ساقتاۋ بولىگىندە مەملەكەتتىك كىرىستەر ورگاندارىنىڭ باقىلاۋشى جانە اتقارۋشى قىزمەتتەرىن اتاپ ءوتتى.

 اۆتور: مارلان جيەمباي