باتىس قازاقستاندىق پوليتسيا قىزمەتكەرىنىڭ باتىل قيمىلى كوپكە ۇلگى

ورال. قازاقپارات - باتىس قازاقستان وبلىستىق ىشكى ىستەر دەپارتامەنتى تەرگەۋ باسقارماسىنىڭ جۇرگىزۋشى- پوليتسەيى، پوليتسيا اعا سەرجانتى عابيت نۇعمانوۆ ءوز قىزمەتىنە ادال بولۋدىڭ ۇلگىسىن كورسەتىپ كەلەدى.

قىلمىس اتاۋلىعا توزبەيتىن ول ءتىپتى قاجەت كەزىندە باتىل قيمىلداي دا بىلەدى. وعان تومەندەگى وقيعا دالەل.

دەپارتامەنتتىڭ باسپا ءسوز قىزمەتىنەن تۇسكەن مالىمەتكە قاراعاندا، بيىلعى ءساۋىر ايىندا ع. نۇعمانوۆ قىزمەت بابىمەن قالا كوشەسىمەن كولىكپەن كەلە جاتىپ، كەنەت بەلگىسىز بىرەۋدىڭ كوشەدەگى ۇيلەردىڭ ءبىرىنىڭ قاقپاسىنان ىرشىپ ءتۇسىپ، جۇگىرىپ بارا جاتقانىن بايقايدى. ونىڭ بۇل جۇگىرىسىنە كۇدىكپەن قاراعان ءتارتىپ ساقشىسى بىرەۋدەن قورقىپ قاشىپ كەتىپ بارا جاتىر نەمەسە بىردەڭە ءبۇلدىرىپ قويعان بولسا كەرەك دەپ، ارتىنا تۇسەدى.

ءبىر كەزدە ول ۇيلەردىڭ جانىندا ورنالاسقان گاراجداردىڭ اراسىنا كىرىپ كەتەدى. كەنەت ارتىنان قالماعان ءتارتىپ ساقشىسىنا بۇرىلىپ، قارۋىمەن اتىپ جىبەرمەكشى بولادى. عابيت كولىگىنىڭ ورىندىعىنا جاتا قالادى، جايلاپ باسىن كوتەرىپ قاراسا، ماناعى العا قاراي جۇگىرىپ كەتكەن ەكەن. بۇل دا ماشيناسىن تاستاي سالا، ارتىنان جۇگىرەدى. جۇگىرىپ جەتكەن پوليتسيا قىزمەتكەرىنە الگى كۇدىكتى: «باۋىر، مەنى جىبەر، قۋما ارتىمنان!» دەپ ودان ءارى قاشا جونەلەدى. ءبىراق الگى ادامنىڭ قانداي دا ءبىر ىسكە قاتىسى بارىن سەزىپ، ارتىنان قالماۋعا تىرىسادى. قاشقىن الدا تۇرعان ەكى كوتتەدج ءۇيدىڭ ءبىرىنىڭ اۋلاسىنا سەكىرىپ ءتۇسىپ، كوزدەن عايىپ بولادى. وسى اينالادان ەشقايدا قاشىپ كەتپەيتىنىن سەزگەن ءتارتىپ ساقشىسى دەرەۋ ءوز ارىپتەستەرىن كومەككە شاقىرادى. ارتىنان ءبارى انىقتالادى.

كۇدىكتى سول كۇنى المازوۆ كوشەسىنىڭ بويىنداعى ۇيلەردىڭ بىرىنە كىرىپ، قولىنداعى اڭشىلىق قارۋىمەن قورقىتىپ، ءۇي يەسىنىڭ اقشاسى مەن باعالى التىن بۇيىمدارىن توناپ كەتكەن. وقيعا ورنىنا جەتكەن پوليتسيا قىزمەتكەرلەرى ەكى ءۇيدىڭ بىرىنە ەنىپ، قارۋدى اۋلاعا جاسىرىپ ۇلگەرگەن كۇدىكتىنى قولعا ءتۇسىردى جانە ق ر اكىمشىلىك قۇقىقبۇزۋشىلىق كودەكسىنىڭ 128-بابى بويىنشا ورال قالاسىنىڭ ۋاقىتشا ۇستاۋ يزولياتورىنا قاماۋعا الادى. تەرگەۋ بارىسىندا 48 جاستاعى كۇدىكتىنىڭ بۇرىن سوتتى بولعانى انىقتالدى. كۇدىكتى ورال قالالىق سوتىنىڭ ۇكىمىمەن بيىلعى ماۋسىم ايىندا التى جىلعا باس بوستاندىعىنان ايىرىلدى.

وسىلايشا قىراعىلىق تانىتىپ، قىلمىسكەردىڭ قارۋىنان تايسالماي، قايسارلىق كورسەتكەنى جانە قىلمىستىڭ تەز ارادا اشىلۋىنا مۇمكىندىك جاساعانى ءۇشىن اعا سەرجانت عابيت نۇعمانوۆ ءى ءى د باسشىلىعى تاراپىنان لايىقتى باعالانىپ، مەملەكەتتىك ماراپاتقا ۇسىنىلدى.

اۆتور: ەلجان ەرالى