اتى اڭىزعا اينالعان فۋتبولشىنىڭ اسقازانىنا وتا جاسالدى

استانا. قازاقپارات - ارگەنتينانىڭ اتى اڭىزعا اينالعان فۋتبولشىسى ديەگو مارادونا اسقازانىنا وتا جاسالعاننان كەيىن اۋرۋحانادان شىعارىلدى.

حابارلانىپ وتىرعانداي، فۋتبولشىعا 10 جىلدا ەكىنشى رەت وتكىزىلىپ وتىرعان اسقازان وتاسى ۆەنەسۋەلا ەمحانالارىنىڭ بىرىندە وتكىزىلدى، دەپ جازادى شەتەلدىك ب ا ق.

بۇل وتا ارگەنتينالىق قۇرامانىڭ بۇرىنعى كاپيتانىنا سالماعىن تۇسىرۋگە كومەكتەسۋى ءتيىس. دارىگەرلەردىڭ ايتۋىنشا، فۋتبولشىنىڭ قازىرگى سالماعى نورمادان 75 كەلى كوپ بولىپ وتىر، ال بۇل دەنساۋلىقپەن بايلانىستى بۇدان دا كۇردەلى پروبلەمالارعا اكەلىپ سوقتىرۋى مۇمكىن. 10 جىلداي ۋاقىت بۇرىن مارادوناعا وسىعان ۇقساس وتا جاسالعان.

فۋتبولشىنىڭ دەنساۋلىعى بۇرىننان سىر بەرە باستاعان. 2004 -جىلى ول اسقازان جانە جۇرەك پروبلەمالارىنا بايلانىستى ەكى رەت جانساقتاۋ بولىمىنە تۇسكەن ەدى. 2000 -جىلى ۋرۋگۆايدا مارادونادان كوكايندى مولشەردەن تىس پايدالانۋ سالدارىنان كۇردەلى جۇرەك جەتكىلىكسىزدىگى بايقالعان.