شاڭحايدا «بولاشاق» باعدارلاماسى بويىنشا قىتاي تىلىنەن سينحروندى اۋدارماشىلاردى دايىندايدى - فوتو

 بەيجىڭ- شاڭحاي. قازاقپارات - بۇگىن شاڭحايدا «قازاقستان ورتالىعىنىڭ» اشىلۋى اياسىندا «حالىقارالىق باعدارلامالار ورتالىعى» ا ق پرەزيدەنتى عاني نىعىمەتوۆ پەن شاڭحاي شەتەل تىلدەرى ۋنيۆەرسيتەتىنىڭ پارتيالىق كوميتەتىنىڭ ءبىرىنشى حاتشىسى جيڭ فىڭ «بولاشاق» باعدارلاماسى بويىنشا قىتاي تىلىنەن ءتارجىمالايتىن قازاقستاندىق سينحروندى اۋدارماشىلاردى دايىنداۋ بويىنشا مەموراندۋمعا قول قويدى.

 «قازىر قازاقستان- قىتاي قاتىناستارى بارلىق سالالاردا دامىپ كەلەدى. وسىعان بايلانىستى قازاقستاندىق مەملەكەتتىك مەكەمەلەر، ۇلتتىق كومپانيالار، ۇيىمدار مەن فيرمالاردا قىتاي تىلىنەن ءتارجىمالايتىن سينحروندى اۋدارماشىلارعا دەگەن سۇرانىس بار. حالىقارالىق باعدارلامالار ورتالىعى مەن شاڭحاي شەتەل تىلدەرى ۋنيۆەرسيتەتى اراسىندا كەلىسىمگە قول قويۋى «بولاشاق» اياسىندا قىتايدىڭ جەتەكشى جوعارى وقۋ ورنىندا قىتاي تىلىنەن ءتارجىمالايتىن قازاقستاندىق سينحروندى اۋدارماشىلاردى دايىنداۋعا مۇمكىندىك بەرەدى»، - دەدى قازاقپارات تىلشىسىنە بەرگەن سۇحباتىندا «حالىقارالىق باعدارلامالار ورتالىعى» ا ق پرەزيدەنتى عاني نىعىمەتوۆ.

 ەسكە سالا كەتەيىك، بۇگىن شاڭحاي شەتەل تىلدەرى ۋنيۆەرسيتەتىندە شاڭحايداعى ق ر باس كونسۋلدىعىنىڭ، حالىقارالىق باعدارلامالار ورتالىعىنىڭ جانە اتالعان قىتايلىق جوعارى وقۋ ورنىنىڭ باستاماسىمەن قىتايداعى العاشقى «قازاقستان ورتالىعى» اشىلدى. ورتالىقتى سالتاناتتى تۇردە قىتايداعى قازاقستان رەسپۋبليكاسىنىڭ ەلشىسى ش. نۇرىشيەۆ پەن «حالىقارالىق باعدارلامالار ورتالىعى» ا ق پرەزيدەنتى ع. نىعىمەتوۆ اشتى.

جاقىن ارادا مۇندا شەتەلدىك ستۋدەنتتەر ءۇشىن قازاق ءتىلى كافەدراسىن اشۋ جوسپاردا بار.

 شاڭحاي شەتەل تىلدەرى ۋنيۆەرسيتەتى لينگۆيستتەر مەن 23 تىلدەن ءتارجىمالايتىن اۋدارماشىلاردى دايىندايدى. ونى 100 دەن استام قازاقستاندىق ستۋدەنت پەن ماگيسترانت، سونىڭ ىشىندە قازاقستان پرەزيدەنتىنىڭ «بولاشاق» حالىقارالىق ستيپەندياسىنىڭ 16 يەگەرى ءتامامدادى.