استانا حالىقارالىق اۋەجايى قاۋىپسىزدىك شارالارىن كۇشەيتىپ جاتىر

 استانا. قازاقپارات - كەيبىر شەت مەملەكەتتەردە بولىپ جاتقان قايعىلى وقيعالارعا بايلانىستى استانا اۋەجايى قاۋىپسىزدىك شارالارىن كۇشەيتۋدە.

 اۋەجايدا 2015 - جىلعى 14 - قاراشادان باستاپ جولاۋشىلار تەرمينالىنىڭ كىرە بەرىسىنە تەكسەرۋ جابدىقتارى ورناتىلدى، دەپ حابارلادى «Airport Management Group».

 بارلىق جولاۋشىلار، اۋەجاي قىزمەتكەرلەرى، سونداي- اق شىعارىپ سالۋشى جانە قارسى الۋشى تۇلعالار قولمەن تەكسەرىلەدى. جولاۋشىلاردى تەكسەرۋ تاۋلىك بويى جۇرگىزىلەتىن بولادى.

 وسىعان بايلانىستى، حالىقارالىق استانا اۋەجايىنىڭ باسشىلارى، بارلىق جولاۋشىلاردان اۋەجايعا حالىقارالىق رەيستەرگە الدىن- الا 3 ساعات بۇرىن، ال ىشكى رەيستەرگە الدىن- الا 2 ساعات بۇرىن كەلۋلەرىنە كەڭەس بەرەدى.

 سونىمەن قاتار، اۆياتسيا قاۋىپسىزدىگىن قامتاماسىز ەتۋ ماقساتىندا ءبىرقاتار تارتىپتەردى ەسكە سالادى: جارىلعىش زاتتار، سىعىلعان جانە سۇيىتىلعان گازدار، تەز جاڭعىش زاتتار، قارۋدىڭ بارلىق تۇرلەرى، وتكىر ءارى شانىشقىلى زاتتار باگاج رەتىندە تاسىمالدانبايدى. سونىمەن بىرگە، قول جۇگىندە سۇيىقتىقتار، اەروزول، گەل سياقتى زاتتاردىڭ مولشەرى 100 م ل- دەن اسپاۋى ءتيىس. بۇل ورايدا، ۇشۋ بارىسىندا پايدالانۋعا قاجەتتى دارىلىك زاتتار نەمەسە بالالاردىڭ تاماعىنا عانا رۇقسات بەرىلەدى.

 كۇن سايىن استانا اۋەجايى 38 باعىت بويىنشا 12000 جولاۋشىعا دەيىن قىزمەت كورسەتەدى. استانا اۋەجايى قاۋىپسىزدىك شارالارىن قامتاماسىز ەتۋ بويىنشا قىزمەتتەردى قازاقستان رەسپۋبليكاسىنىڭ زاڭنامالارى مەن ي ك ا و حالىقارالىق ستاندارتتارىنا (ازاماتتىق اۆياتسيانىڭ حالىقارالىق ۇيىمى) سايكەس جۇزەگە اسىرادى.

اۆتور: ايدىن بايمەن