مۇسىلمان جىگىتى پاريجدەگى جارىلىس كەزىندە مىڭداعان جاننىڭ ءومىرىن ساقتاپ قالدى

استانا. قازاقپارات - پاريج قالاسىنداعى «ستاد دە فرانس» ستاديونىنداعى جارىلىس قۇرباندارىنىڭ سانى الدەقايدا كوپ بولار ەدى.

 AP جانە WSJ اقپارات اگەنتتىكتەرىنىڭ تاراتقان جاڭالىقتارىندا اتالمىش ستاديوندا كۇزەتشى- باقىلاۋشى بولىپ قىزمەت اتقاراتىن زاۋر ەسىمدى مۇسىلمان جىگىتىنىڭ قىراعىلىعى ارقاسىندا مىڭداعان جان امان قالعان كورىنەدى.

كەيبىر باسپا ءسوز قۇرالدارىندا ونىڭ شىققان تەگى سيريالىق ەكەنى ايتىلادى دەپ جازادى muslim.kz.

13-قاراشا كۇنى ول ءوزىنىڭ قىزمەت ورنىندا، دالىرەك ايتقاندا، سپورتشىلار كيىم اۋىستىراتىن بولمەگە اپاراتىن توننەلدى قاراۋىلداپ تۇرعان. ءدال وسى جەردەن بەلىنە جارىلعىش زات وراعان جانكەشتى بيلەتى بارىن، ءبىراق اداسىپ كەتكەنىن ايتىپ، ءوتىپ كەتپەك بولادى.

باستالعانىنا ون مينۋتتاي بولعان ويىنعا كەشىگىپ قالاتىنىن ايتىپ الداۋسىراتقانىمەن، ونىڭ بۇل قۋلىعى جۇزەگە اسا قويمايدى. ءتىپتى بولماعاسىن، كۇشتەپ ءوتىپ كەتۋگە تىرىسقان ونى زاۋر ۇستاپ ۇلگەرەدى. ارپالىس ۇستىندە ونىڭ بەلىنە بايلانعان جارىلعىش بەلدىك بايقالىپ قالادى.

جانتالاسا ءجۇرىپ زاۋردىڭ قولىنان سىتىلىپ شىققان جانكەشتى بار كۇشىمەن جۇگىرە جونەلگەن. الايدا، ايعاي- شۋدى ەستىپ وقيعا ورنىنا كەلىپ جەتكەن پوليتسەيلەر ونىڭ الدىنان شىعادى. باسقا امالى قالماعان لاڭكەس تۋرا سول جەردە ءوزىن جارىپ جىبەرەدى. جارىلىستان جاقىن كەلگەن ءبىر پوليتسەي كوز جۇمادى. ىلە- شالا ءۇش مينۋتتان سوڭ ستاديوننىڭ باسقا جاعىنان جارىلىس ورىن الادى.

قاندى وقيعانى زەرتتەۋشىلەردىڭ ايتۋىنشا، زاۋرعا ۇستالىپ قالعان جانكەشتى جوسپار بويىنشا ءوز- ءوزىن الاڭ ورتاسىندا جارۋى ءتيىس بولعان. بۇدان سوڭ شوشىنعان حالىق شىعار ەسىككە توپتالعاندا، ونىڭ ەكى ارىپتەسى «بەلدىكتەرىن» ىسكە قوسادى. وسىلايشا، كەپتەلىس كەزىندەگى جارىلىس مىڭداعان جاننىڭ ومىرمەن قوشتاسۋىنا سەبەپ بولاتىن ەدى.