فرانسيا سيرياداعى «يسلام مەملەكەتىنىڭ» ورتالىعىن بومبالاپ جاتىر

استانا. قازاقپارات - فرانسيا اۋە كۇشتەرى سيريادا «يسلام مەملەكەتى» (ي م) ەكسترەميستىك ۇيىمىنىڭ ورتالىعى سانالاتىن راككا قالاسىنا اۋەدەن سوققى جاسادى. فرانسيا بيلىگى پاريجدەگى تەراكتىلەردى جاساۋعا كومەكتەسۋى مۇمكىن دەلىنگەن كۇدىكتىلەردى دە ىزدەپ جاتىر.

فرانسيا قورعانىس مينيسترلىگىنىڭ 15- قاراشادا تاراتقان اقپاراتىنا قاراعاندا، فرانسۋز ۇشاقتارى راككاعا 20 بومبا تاستاپ، سودىرلاردىڭ جاتتىعۋ لاگەرى مەن وق-ءدارى قويمالارىن جويعان.

تۇركيادا «ۇلكەن جيىرمالىق» (G20) سامميتىندە سويلەگەن فرانسيا سىرتقى ىستەر ءمينيسترى لوران فابيۋس اۋە شابۋىلىنىڭ تەراكتىدەن ءوزىن-ءوزى قورعاۋ ماقساتىندا جاسالعانىن ايتتى.

«ءبىز ي م شابۋىلدارىن جاۋاپسىز قالدىرا المايمىز»، - دەدى فابيۋس.

لوندوندا ورنالاسقان Syrian Observatory for Human Rights ۇيىمى اۋە شابۋىلدارىنان زارداپ شەككەندەر تۋرالى مالىمەت تۇسپەگەنىن مالىمدەدى.

13- قاراشادا پاريجدە بولعان بىرنەشە تەررورلىق شابۋىلداردان 132 ادام قازا تاۋىپ، 350 گە تارتا ادام جارالانعان. ولاردىڭ 100 گە جۋىعىنىڭ حالى اۋىر.

ەۋروپادا 2004-جىلى مادريدتە بولعان جارىلىستاردان كەيىن مۇنداي ەڭ اۋقىمدى تەراكتىلەر ءبىرىنشى رەت بولىپ وتىر.

«ازاتتىق»