اتىراۋ كوشەلەرىنىڭ بويىمەن اپاتقا ۇشىراعان كولىكتەردى الىپ ءوتتى - فوتو

اتىراۋ. قازاقپارات - اتىراۋدا جەكسەنبىدە اكىمشىلىك پوليتسيا قىزمەتكەرلەرى «ەسىڭە ال جانە ويلان» اتتى ۇرانىمەن وتكەن اكسيا اياسىندا جول اپاتتارى قۇرباندارىن ەسكە الدى.

«9-15- قاراشا ارالىعىندا وتكىزىلەتىن «قاۋىپسىز جول قوزعالىسى اپتالىعى» اكسياسى شەڭبەرىندە پوليتسيا قىزمەتكەرلەرى قاۋىپسىزدىك بەلبەۋىن تاعۋ، بالالارعا ارنالعان كرەسلولاردى قولدانۋدى ناسيحاتتاۋ ءۇشىن «ءسىزدىڭ جولاۋشىڭىز - بالا!»، قاۋىپسىز جول قوزعالىسىن قامتاماسىز ەتۋگە باعىتتالعان الەۋمەتتىك جارناما بويىنشا جاستار مەن ستۋدەنتتەر اراسىندا شىعارماشىلىق جۇمىستار، اۆتو مەكتەپتەردىڭ كۋرسانتتارى اراسىندا «ۇزدىك اۆتو مەكتەپ» كونكۋرستارىن وتكىزدى. ال دەمالىس كۇندەرى جول-كولىك وقيعالارىن بولدىرماۋ، جۇرگىزۋشىلەرگە وي تاستاۋ ماقساتىندا جول-كولىك وقيعالارىنا ۇشىراعان اۆتوكولىكتەر كورمەسى وتكىزىلدى»، دەلىنگەن حابارلامادا.

بۇكىل الەمدىك جول-كولىك وقيعالارى قۇرباندارىن ەسكە الۋ كۇنى قارساڭىندا «ەسىڭە ال جانە ويلان» ۇرانىمەن وتكىزىلىپ جاتقان قوعامدىق اكسيا كەزىندە اتىراۋ وبلىسى ىشكى ىستەر ورگاندارىنىڭ 60 قىزمەتكەرى قان ورتالىعىنا بارىپ 27 ليتر قان تاپسىردى.

جىل باسىنان بەرى اتىراۋ وبلىسى بويىنشا 335 جول-كولىك وقيعاسى تىركەلىپ، 65 ادام قازا تاپسا، 392 ادام جاراقات العان.