ەلوردا تاكسيستەرى ءۇشىن ءبىرىڭعاي تالاپتار ازىرلەنۋدە

استانا. قازاقپارات - ەلوردا اكىمدىگى زاڭدى جۇمىس ىستەپ جۇرگەن تاكسيلەر ءۇشىن ءبىرىڭعاي تالاپتاردى ازىرلەۋدە.

 بۇل تۋرالى «قازاقپارات» تىلشىسىنە بەرگەن سۇحباتىندا استانا LRT» « ج ش س جولاۋشى كولىگى باسقارماسىنىڭ جەتەكشىسى بەيبىت ەسجانوۆ ءمالىم ەتتى.

استاناداعى تاكسي جەلىسىن جەتىلدىرۋ بويىنشا جوبا «City taxi» دەپ اتالادى. ونىڭ اياسىندا قاجەتتى وزگەرتۋلەر جاسالىپ، زاڭدى جۇمىس ىستەپ جۇرگەن تاكسوپاركتەردى كولىكتەرمەن تولىقتىرىپ، ينفراقۇرىلىمدى دامىتۋ ءۇشىن ءبىرىڭعاي ەرەجەنى ازىرلەۋ قامتىلعان.

ب. ەسجانوۆتىڭ ايتۋىنشا، قازىرگى كەزدە استانانىڭ جولاۋشىلار كولىگى باسقارماسىندا 14 تاكسوپارك تىركەلىپ، ولاردا 500 گە تارتا اۆتوموبيل جۇمىس ىستەۋدە. ياعني، حالقى ميلليونعا جۋىقتاعان ەلوردا ءۇشىن بۇل تاكسي پاركتەرىنىڭ مۇمكىندىگى جەتكىلىكسىز.

«ەسەپتەۋلەرگە قاراعاندا، قالا قاجەتتىلىگىن قامتۋ ءۇشىن 3 مىڭعا جۋىق تاكسي كەرەك بولىپ وتىر. العاشقى كەزەڭدە كولىكتەر سانى كەم دەگەندە 1100-گە جەتۋى ءتيىس»، - دەپ ءتۇسىندىرىپ ءوتتى ول.

اتاپ ايتقاندا، تاكسيستەرگە ارنالعان ءبىرىڭعاي تالاپتاردى زاڭنامالىق تۇرعىدا بەكىتۋ جوسپارلانىپ وتىر. «تاكسيدىڭ سىرتقى ءتۇرى ءبىرىڭعاي فورماتتا بەكىتىلۋى كەرەك بولادى. سونىمەن قاتار وسى قىزمەت ءتۇرى ليسەنزيالانۋى قاجەت. بۇل ليسەنزيانى الۋ ءۇشىن جۇرگىزۋشى الدىمەن ءتيىستى مامانداندىرىلعان وقۋ ورنىندا بىلىكتىلىگىن جەتىلدىرۋگە مىندەتتى بولادى»، - دەدى ALRT وكىلى.

مۇنىمەن قوسا، جۇرگىزۋ شاھاردى وتە جاقسى ءبىلۋى ءتيىس. قاۋىپسىزدىك تالاپتارىنا ساي ماشينالار سەرۆيستىك قىزمەت كورسەتۋدىڭ ارنايى ورىندارىندا جوندەلەدى.

وسى ورايدا ول زاڭدى جۇمىس ىستەيتىن تاكسيستەر بۇل تالاپتاردى قابىلداۋى كەرەك نەمەسە بۇل نارىقتان كەتۋى ءتيىس ەكەنىن جەتكىزدى.

 بۇل جوبانىڭ اياسىندا تاكسي ينفراقۇرىلىمىن دامىتۋ كوزدەلىپ وتىر. بۇگىندە قالا بويىنشا تاكسيلەرگە ارنالعان 47 ورىن جاساقتالعان، الداعى ۋاقىتتا ولاردى 300 گە دەيىن ارتتىرۋ قاراستىرىلۋدا.

اۆتور: رۋسلان عابباسوۆ