قازاقستاندىقتار پاريجدەگى لاڭكەستىك ارەكەتتەن قازا تاپقانداردىڭ قايعىلارىنا ورتاقتاسۋدا
قازاقستاندىقتار الەۋمەتتىك جەلىدە پاريجدەگى قايعىلى وقيعاعا ورتاقتاسىپ، كوڭىل ايتىپ جاتىر. ەلىمىزدىڭ بەلگىلى ازاماتتارى مەن ونەر جۇلدىزدارى وزدەرىنىڭ ينستاگرامم پاراقشالارىنا قارا جامىلعان ەيفەل مۇناراسىنىڭ سۋرەتىن قويىپ، وزدەرىن قايعىعا ورتاق ەكەندىكتەرىن بىلدىرۋدە.
بەلگىلى عالىم، جۋرناليست قۋاندىق شاماحاي ۇلى: «پاريج تۇرعىندارىنا وبال بولدى. يسلام اتىن جامىلعان لاڭكەستەردىڭ ايۋاندىق ارەكەتتەرىنىڭ سالدارىنان بەيبىت ازاماتتار اجال قۇشتى. ساقتىق كەرەك!» - دەپ ءوزىنىڭ فەيسبۋكتەگى پاراقشاسىندا جاريالادى.
جۋرناليست اۋەسبايدىڭ قاناتى دا: «پاريجدەگى لاڭكەستىك سالدارىنان قازا بولعانداردىڭ بارلىق تۋعان- تۋىستارىنا، جاقىن- جۋىقتارىنا قايعىرىپ، كوڭىل ايتامىن.
كەشە كەشكىسىن ولاردىڭ ءبىرى كوڭىل ساۋىقتىرىپ، رۋحاني ءلاززات الماققا، سۇيىكتى اكتەرىن كورمەككە تەاترعا كەلگەن بولار. كەيبىرى سۇيىكتى كومانداسىنا بولىسپاققا ستاديونعا ات باسىن بۇرعان بولار. كەيبىرى جاي عانا پاريجدىڭ رومانتيكالىق كەشىندە قولىنا ءبىر شوق گۇلىن ۋىستاپ، سۇيىكتىسىن قۋانتپاققا اسىققان بولار.
ءبىراق... تەرروريزم الەمدىك ساياسي ينتريگالاردان بەيحابار، ەش جازىعى جوق قاراشا حالىقتىڭ سۇيىسپەنشىلىكتەرىنىڭ ءاپ ساتتە جولىن كەسىپ كەتتى. قاراپايىم جۇرت كۇيزەلىستە، ال ءدال وسى ساياسي سايقال سپەكتاكلدىڭ اۆتورلارى قازىر كەلەسى قادامدارىن ويلاپ، قولدان جاسالعان «لاڭكەستەرگە تويتارىس بەرەمىزدىڭ» قامىندا ءجۇر.
ءبىراق... قان- جىنى شىققان سيريا، ۇڭعىسىنان ءتۇتىنى سەيىلمەگەن اۋعانستان، يراكتاردا، قانشاما قاراشا حالىق قازا بولدى؟ ! ناقتى قيسابى دا جوق شىعار. ولاردىڭ سۇراۋى كىمنەن؟ شەرحان اتامشا تامسىلدەسەك، ءبىر كەم دۇنيە ايتەۋىر»، - دەپ جازعان الەۋمەتتىك جەلىدەگى پاراقشاسىنا.
قايعىلى وقيعا اقىنداردىڭ دا نازارىنان تىس قالماعان. وعان بەلگىلى اقىن ەرلان ءجۇنىستىڭ مىنا ءبىر ولەڭ جولدارى دالەل بولا الادى:
لۋۆر جابىلدى.
يزيدا ءۇنسىز.
ۆەنەرا مۇڭدى.
پاريجدە گوتيكالىق مانەر.
ەلىتەرسىڭ كىمدى،
وق ءدارى ءيىسى اتىردەن كۇشتىرەك، شانەل!؟.
ەليسەي القابىن بودلەر گۇلدەرى جاپتى -
زۇلىمدىق گۇلدەرى...
ەيفەل وتتارىن جاقتى -
دجوكوندا كۇلمەدى.
جابىلسا - جاڭعاق،
اپەلسين سەكىلدى اشىلعان تەرەزەڭ،
و، كۇزدە نەلىكتەن ولەڭدەر توڭعاق،
نەلىكتەن كەبەدى كەنەزەڭ؟!.
مەن حالقىم سەكىلدى تۇپ-تۇنىق اسپاندى سۇيەم،
ادامدار نەلىكتەن اسپانعا سەنبەيدى؟
...قايعىڭا ورتاقپىن، گييوم،
پاريجدە ولەڭدەر ولمەيدى!
اقىندار ولسە دە...
