تىم داراشىلدىق تا قاجەت ەمەس

استانا. قازاقپارات - بالالاردا جاس كەزىنەن باستاپ ولاردىڭ مىنەزىندە كەيبىر ەرەكشەلىكتەر بايقالادى.

كەيبىر بالالار كوپشىل، ال كەيبىرى بىرلەسىپ ويناۋعا، كوڭىل كوتەرۋگە قينالىپ ارالاسادى. كوپشىلىگىن ۇيالشاقتىق بوگەيدى. ءبارىنىڭ دە ۇجىم ومىرىنەن تاجىربيەسى از. مەكتەپتە وقىپ، وزگە بالالارمەن ارالاسۋ - بالانىڭ ۇجىمدىق، كوپشىلدىك سەزىمىن وياتىپ، داعدىسىن جەتىلدىرەدى.

ءبىراق كەيبىر بالالار بەلگىلى ءبىر سەبەپتەردەن بالالار قوعامىنان اجىراپ، ءوز اتا- اناسىنان دا سىرتتاپ قالادى. ول بىرتىندەپ وزىمەن- ءوزى بولىپ، ءوزىنىڭ ويىمەن، ۋايىمىمەن وڭاشا بولادى دا داراشىلدىق سەزىمگە بەرىلەدى. مۇندا سەزىم بالادا اسىرەسە، ءۇي جاعدايىنىڭ قولايسىزدىعىنان پايدا بولادى.

وتباسىندا اتا- انانىڭ ءوزارا كەلىسە الماۋىنان، ۇرىس كوبىرەك بولاتىن ۇيدەن بالا سىرتتاپ قالادى. مەكتەپتە قانشالىقتى ونەگەلىك ءسوز ايتقانىمەن، اتا- اناسىنىڭ مىنەز- قۇلىقتارىنىڭ ۇيلەسپەۋشىلىگى بالانىڭ پسيحيكاسىنا اۋىر اسەر ەتەدى. وسى ۇيلەسپەۋشىلىكتىڭ سالدارىنان بالا ومىردەن ءتۇڭىلىپ، ءۇي ىشىنە دە، مەكتەپكە دە سەنبەي، ءوز ويىمەن ۋاقىتىن وتكىزەدى. بۇل پروتسەسس اسىرەسە، جەتكىنشەكتەرگە كوبىرەك باتادى.

ولار بۇل جاستا ءومىردىڭ ءمانى، جاقسىلىق پەن جاماندىق، ادامنىڭ ومىردە الاتىن ورنى مەن مىندەتى جونىندە ويلانادى. بىرىنشىدەن، ءبىلىمى مەن تاجىربيەسىنىڭ ازدىعى، ەكىنشىدەن، اسا قىزۋلىق جەتكىنشەكتەردى تەرىس قورىتىندىعا اكەلىپ سوقتىرادى.

نازىك وسكەن، كوبىرەك ماقتالعان، باسقا بالالاردان ونى ارتىق تۇتقان، ءۇي شارۋاسىنان بوساتىلعان، ەشتەڭە ويىنا كىرىپ- شىقپايتىن بالا دا داراشىل بولىپ وسەدى. ول تەك وزىمەن، ءوزىنىڭ تىلەگىمەن عانا ساناسادى، باسقانى كوزگە ىلمەۋگە، ەلەمەۋگە ادەتتەنەدى.

بالالارداعى داراشىلدىقتىڭ پايدا بولۋ سەبەپتەرى: ۇجىمداعى (كوپشىلىك) قىزۋ دا قايناعان ىستەن شەت قالۋشىلىق، جولداستارىمەن كەلىسە الماۋ، دورەكىلىك، وزىمشىلدىك، تۇيىقتىق جانە پەداگوگتاردىڭ ىقپالىن كونبەۋشىلىك. ءبىراق دوستىققا زارىققان بالا، ەگەر اتا- انا ونىڭ ءتىلىن تابا بىلسە، ءوزى- اق شەشىلەدى. اتا- انا تالاپ قويىپ، سىناپ وتىرۋشىلىق بەرىك ورىن السا، بالا بويىنداعى ماقتانشاق پەن وزىمشىلدىك تاكاپپارلىعىنان ارىلادى.

ۇلىڭىز بەن قىزىڭىزدىڭ داراشىلدىعى بىلىنە باستاسا، اسا ءبىر قايىرىمدىلىقپەن سويلەسۋ ارقىلى جاقسى دوستار مەن جولداستار تاۋىپ الۋعا كومەكتەسىڭىز. سوندا عانا پەرزەنتىڭىزدىڭ داراشىلدىعىن جويا الاسىز. جاقسى ادام بولىپ وسۋىنە ىقپال جاسايسىز.

mazhab.kz