ۇيالۋ سەزىمى قاشان قالىپتاسادى؟
بۇل ادامعا كەمشىلىكتەرگە قارسى كۇرەسە بىلۋگە كومەكتەسەدى.
بالا ادامگەرشىلىك مورال جانە دۇرىس ءتارتىپ ساقتاۋ دەگەننىڭ نە ەكەنىن تۇسىنە باستاعاننان- اق، وندا ۇيالۋ سەزىمى پايدا بولا باستايدى. بوبەك كىتاپتى جىرتىپ تاستادى. ۇلكەندەر وعان ونىڭ جامان ءىس جاساعاندىعىن ايتىپ تۇسىندىرەدى. ول ءوزىنىڭ جامان ىسىنە قينالادى، ونىڭ سىرت ءپىشىنى وزگەرەدى: بەتى قىزارادى، انىق سويلەي الماي قىسىلادى، اينالاسىنداعىلارعا تۋرا قاراي المايدى.
الداعى ۋاقىتتا ءوزىنىڭ ەرسى قىلىعىن تالداي بىلۋگە ۇيرەنگەننەن كەيىن، بالا ەندى ءوزى قىلىعىنا ءوزى ەسەپ بەرىپ، جاۋاپكەرشىلىكتى سەزىنەتىن بولادى. كەيدە ول ءتىپتى جامان قىلىق جاسايمىن دەگەن ويدان وزىنەن دە ۇيالاتىن بولادى. تەرىس ىسكە، تەرىس ويعا قارسى ىشتەي كۇرەس جۇرگىزۋ، ارينە، بۇل دۇرىس قۇبىلىس. بۇل - بالا ءوزىنىڭ تەرىس ءىسىن مويىنداپ، جامان قىلىق جاساۋدان اۋلاق بولىپ، ءوزىنىڭ ءتارتىبىن تۇزەتۋگە قابىلەتتى دەگەن ءسوز.
جاس وسكىننىڭ مىنەز-قۇلقىنا جامان ءىس ىستەۋگە بەيىمدىلىك بىلدىرگەن جاعىمسىزدىق جاقتارىن دا دەر كەزىندە اڭعارۋ وتە ماڭىزدى. بالادا جالقاۋلىق پايدا بولا باستاعانىن جانە جولداستارىنا ىقىلاسسىز قارايتىندىعىن اڭعارىپ، اتا-اناسى تەز ارادا اڭگىمەلەسۋ ارقىلى دۇرىس مىنەز قالىپتاستىرۋ كەرەك. اكەسىنىڭ، نە شەشەسىنىڭ اشىق سويلەسۋىنەن بالادا ۇيالۋ جانە وكىنۋ سەزىمى پايدا بولادى.
جاسوسپىرىمدەردە مۇنداي سەزىم اتا- انانىڭ ونەگەلى ىسىنەن پايدا بولادى. اتا-انانىڭ قايىرىمدى، جومارت، ەڭبەكسۇيگىش بولۋى بالانى جاقسى مىنەزگە قالىپتاستىرادى. ونىڭ بويىنان ۇيالشاقتىعى ويانىپ، ادامگەرشىلىك قاسيەتى ارتىپ، جاقسى مەن جاماندى اجىراتا بىلەدى.
بەيسەن سۇلتان ۇلى
