وزون ويىعى بارلىق تىرشىلىك اتاۋىنا ۇلكەن قاۋىپ توندىرۋدە

استانا. قازاقپارات - انتاركتيدانىڭ ۇستىندەگى وزون قاباتى - جەردىڭ ەڭ وسال نۇكتەسى. سەبەبى اتالعان ايماقتاعى وزون قاباتىندا اتموسفەرالىق ويىق پايدا بولعان.

حيميالىق زاتتاردىڭ اۋاعا تاراۋىنان ول جىل سايىن ۇلكەيىپ كەلەدى. ويىقتىڭ بۇگىنگى ايماعى سولتۇستىك امەريكا ماتەريگىنەن دە اسىپ تۇسكەن. بۇل تۋرالى گەرمانياداعى DLR اەروعارىشتىق اگەنتتىگى حابارلادى.

ويىقتىڭ اۋدانى 26 ميلليون شارشى شاقىرىمعا جەتكەن. عالىمداردىڭ ايتۋىنشا، مۇنداي ۇلكەن ويىق جىلى اۋا ماسسالارىنىڭ وڭتۇستىك پوليۋسكە قاراي باعىت الۋىنان قالىپتاسقان.

 نەمىس عالىمدارى دايىنداعان بەينە ارقىلى انتاركتيدانىڭ ۇستىندە پايدا بولعان وزون ويىعى اۋماعىن كورە الامىز: اتموسفەرانىڭ تومەنگى قاباتىنداعى ەڭ قاۋىپتى اۋا ماسساسى -  وزون. ول اتموسفەرادا زاۋىتتار مەن كولىك قوزعالتقىشتارىنان شىققان جانارماي قالدىقتارىنان ءتۇتىن قاباتىن تۇزەدى. ال اۋا قاباتىنىڭ جوعارعى بولىگىندە ول قورعانىس قاباتىنا اينالادى. وزون جەردەگى تىرشىلىك كوزىن كۇننىڭ  قاۋىپتى ساۋلەسىنەن ساقتايدى. ەگەردە وسى ويىق ءتۇبى ۇلكەيە بەرسە، جەر بەتىندەگى بارلىق تىرشىلىك اتاۋىنا ۇلكەن قاۋىپ توندىرەتىنى بەلگىلى. قايتپەك كەرەك؟ عالىمدار قازىر وسى ماسەلەنى زەرتتەۋدە. ءبىر ايتا كەتەتىن جايت، 2006 -جىلدىڭ قىركۇيەك ايىندا وزون قاباتىنداعى ەڭ ۇلكەن ويىق تىركەلگەن. ال بيىلعى كورسەتكىش جاڭا رەكورد ورناتۋى ىقتيمال.

تەمىرلان بايازيت

«ايقىن»