ءوزىن تىم ەرەكشە جاقسى كورەتىن ءانشى
ەرنار ايدار ونەر جولىنا كەلمەس بۇرىن اكەسىنەن تۇيگەنى كوپ ەكەنىن ماقتانىشپەن ەسكە الادى. اكە تاربيەسىنەن شىڭدالعان بوزبالا شىعارماشىلىعىندا ودان ءارى قاناتتانا تۇسكەن. ۇلكەندەرگە سىي- قۇرمەتىن ايامايتىن ءانشى حالىقپەن قانداي قارىم- قاتىناستا بولۋدى دا جاقسى مەڭگەرگەن.
"ونەر ادامنان شىنايىلىقتى تالاپ ەتەدى. «اعاش جەمىستەگەن سايىن باسى يىلە بەرەدى» دەيدى عوي. سول سەكىلدى تانىمالدىعىمىز ارتقان سايىن ونەر تالابى بويىمداعى ادامگەرشىلىك پەن كىشىپەيىلدىلىكتى مولايتا ءتۇستى دەي الامىن"، - دەيدى ءانشى اڭگىمەسىندە.
ەرنار ايدار شوۋ- بيزنەستە كوڭىلىنە قاياۋ تۇسىرگەن ساتتەردىڭ دە ورىن الىپ تۇراتىنىن جاسىرمايدى. ءبىراق ءوزىن جاقسى كورەتىن ءانشى ەشقاشان ەڭسەسىن تۇسىرگەن ەمەس.
"جالپى، ءوزىمدى جاقسى كورەمىن. «ءوزىن - ءوزى سىيلاعان ادام وزگەگە دە ءوزىن سىيلاتا الادى» دەيدى عوي. سول سەبەپتى ادام ءوزىن- ءوزى سىيلاۋى كەرەك، جاقسى كورۋى كەرەك. ءار ادامعا ءتۇردى، مىنەزدى، دارىن- قابىلەتتى اللانىڭ ءوزى بەرەدى. سول بەرىلگەن قۇندىلىقتاردى باعالاي ءبىلۋ كەرەك"، - دەيدى ءانشى.
ەرناردىڭ ايتۋىنشا، ونىڭ ءار كۇنى ءارقالاي وتەدى. بەلگىلى ءبىر "رەجيمى" جوق. كەي كۇنى ۇيقىمەن وتسە، كەيدە ۇيقىسىز وتەدى، كەيدە تاماقپەن وتسە، كەيدە تاماقسىز وتەدى.
سونداي- اق، ءانشى ازىرگە جۇرەگىن جاۋلاعان قىزدىڭ جوق ەكەنىن ايتا كەلىپ، ۇيلەنۋدەن قورىقپايتىنىن اتاپ ءوتتى.
"ونداي قورقىنىش جوق. سەبەبى، مەنىڭ ويىمشا، شىعارماشىلىقتىڭ قۇلدىراۋى نەمەسە شارىقتاۋى بۇل جاعدايعا مۇلدەم بايلانىستى ەمەس. ەگەر، ادام ونەرگە شىنايى قىزمەت ەتىپ، تىنىمسىز ەڭبەكتەنەتىن بولسا، ونداي جاعدايلار تۋىندامايدى دەپ ويلايمىن"، - دەپ جالعاستىردى ءانشى.
كاسىبي انشىلىككە دايىندالىپ جۇرگەن ءارتىس، جۋىردا استانا قالاسىندا ايقىنمەن بىرگە جاندى داۋىستا كونسەرت بەرۋدى جوسپارلاپ وتىر. ەرنار ايدار بولاشاقتا تەك جاندى داۋىستا ونەر كورسەتۋگە تالپىناتىنىن جەتكىزدى.
بۇعان قوسا، ءانشىنىڭ ەڭ باستى قۇندىلىعى اتا- اناسى ەكەن. اكە- شەشىنىڭ رازىلىعى اللانىڭ رازىلىعى ەكەنىن جاقسى تۇسىنەتىن ەرنار ايدار پەرزەنتتىك پارىزىن ەشقاشان ۇمىت قالدىرعان ەمەس.
