فرانسياداعى تەراكت: قالا بيلىگى تۇرعىندارعا ۇيدەن شىقپاۋدى ەسكەرتتى
قاندىقول لاڭكەستىك ارەكەت كەشە تۇندە باستالدى. الدىمەن الدەكىمدەر كامبودجا مەيرامحاناسى تۇسىندا كالاشنيكوۆ اۆتوماتىنان وق جاۋدىرعان. ودان كەيىن وزگە دە اۋماقتاردا دا وق اتىلىپ، ستاديون ماڭىندا ءۇش بومبا جارىلدى. جارىلىستى ەكى جانكەشتى ۇيىمداستىرعان. وسى كەزدە ستاديوندا فرانسيا مەن گەرمانيا قۇرامالارى اراسىندا فۋتبول ويىنى ءوتىپ جاتقان. ماتچتى كورۋگە كەلگەن ەل پرەزيدەنتى فرانسۋا وللاند پەن وزگە جوعارى لاۋازىمدى تۇلعالار دەرەۋ قاۋىپسىز جەرگە شىعارىلعان. كەيىن Bataclan كونسەرت زالىندا دا اتىس بولىپ، سودىرلار ءجۇز شاقتى ادامدى كەپىلدىككە الدى. مەرت بولعاندار تۋرالى ناقتى اقپارات جوق. 120 ادامنىڭ باقيلىق بولعان جونىندە رەسمي ايتىلعان. ءبىراق كەيبىر اقپارات كوزدەرى قازا تاپقاندار سانى الدەقايدا كوپ دەپ وتىر. سونداي- اق پوليتسيانىڭ مالىمدەۋىنشە، ون شاقتى ادام اۋىر حالدە.
سودىرلاردىڭ شابۋىلدارىنان ءالى دە قاتەر بار. Bataclan زالىندا پوليسيا ءتورت لاڭكەستىڭ كوزىن جويعان. پرەزيدەنت فرانسۋا وللاندتىڭ بۇيرىعىمەن توتەنشە جاعداي ەنگىزىلىپ، شەكارا جابىلدى. توتەنشە جاعداي فرانسيا تاريحىندا كەيىنگى 60 جىلدا نەبارى 5 رەت جاريالانعان. بۇل ورايدا كولىك قوزعالىسى شەكتەلىپ، ادامداردىڭ دا بەيساۋات جۇرۋىنە تىيىم سالىنادى. كوپشىلىك ورىندار جۇمىس ىستەمەيدى. قازىر قالادا مەترو مەن اۆتوبۋس باعدارلارىنىڭ كەيبىر بولىكتەرى جابىلعان. قالا بيلىگى تۇرعىندارعا ۇيدەن شىقپاۋدى ەسكەرتتى. ءتىپتى جۇمىستان دا سىرتقا اتتاپ باسپاۋعا كەڭەس بەرىلگەن. كەشە جۇما كۇنى مەيرامحانالاردا بولعان جۇرت ۇيىنە جەتە الماي جاتىر. ال اۋەجايلار مەن ۆوكزالداردىڭ جۇمىسى بەلگىسىز. قازىر پاريجدەگى مەنشىكتى ءتىلىشىمىز ەلەنا مينكيەۆيچ وقيعا ورنىندا جۇرگەنىن ايتا كەتەيىك. الداعى ساعاتتاردا وقيعانىڭ سەبەپ- سالدارىن ناقتىلاي تۇسەتىن بولامىز.
