تالاپحان ءپاتىحان ۇلىنىڭ «سيقىرلى قالامى» قازاقىلىققا تاربيەلەيدى

استانا. قازاقپارات - بالالارعا ارنالعان زاماناۋي وقۋ- تاربيە قۇرالىنىڭ كەرەمەت قاسيەتتەرى كوپ.

قىتايداعى ۇلتجاندى قانداسىمىز تالاپحان ءپاتىحان ۇلىنىڭ اۆتورلىعىمەن ويلاپ تاپقان سيقىرلى قالام قازاقستاندا دا ساتىلا باستادى. بالالارعا ارنالعان زاماناۋي وقۋ- تاربيە قۇرالىنىڭ كەرەمەت قاسيەتتەرى كوپ. بۇل تۋرالى kaztrk.kz-نىڭ قىتايداعى ءتىلشىسى حابارلايدى.  

ول الىپپەدەن باستاپ، ماقال- ماتەل، جاڭىلتپاشتار ۇيرەتەدى، ەرتەگىلەر وقيدى، ولەڭدەر جاتتاتقىزادى. بالالاردىڭ وي-ءورىسىن كەڭەيتەتىن وقۋ قۇرالى قىتايداعى قانداستارىمىزدىڭ اراسىندا جوعارى سۇرانىسقا يە. اتالعان قۇرالدىڭ اۆتورلارى بالالاردىڭ 100 پايىزى كىتاپ وقي بەرمەيتىن، قازىرگىدەي كومپيۋتەرلەسكەن زاماندا جەتكىنشەك ۇرپاقتى كىتاپقا قىزىقتىرۋ ءۇشىن وسى «قاستەرلى قالامدى» جاساپ شىعارىپ وتىر ەكەن.

«بۇل ۇيرەنۋ قۇرالىندا ءبىز ەڭ الدىمەن ءتىل تازالىعىن باستى ورىنعا قويدىق. ناتيجەسىندە، تاقپاق، جاڭىلتپاش، جۇمباقتار مەن ولەڭدەردى جاتقا ايتىپ بەرەتىن بالالار كوبەيدى. ءارى ويىن، ءارى وقۋدى العا تۇتقان قۇرال تەك انا ءتىلدى عانا ۇيرەتىپ قانا قويماي، قازاقتىڭ سالت- داستۇرلەرىن دە دارىپتەيدى»، - دەيدى ۇلتجاندى كاسىپكەر تالاپحان ءپاتىحان ۇلى.

بەيسەن سۇلتان ۇلى