قازاقستاندا مەملەكەتتىك قىزمەتتەگى ەرلەردەن گورى ايەلدەر كوپ، نەگە؟
بۇل تۋرالى ق ر مەملەكەتتىك حاتشىسى گۇلشارا ءابدىقالىقوۆا الماتىدا وتكەن «100 ناقتى قادام - ۇلتتىق رەفورمالار جوسپارى» ءماسليحاتىندا مالىمدەدى.
ونىڭ ايتۋىنشا، بۇل كورسەتكىش جۇمىستىڭ ساپاسى بولىپ تابىلمايدى. «مەملەكەتتىك قىزمەتتىڭ ساپالى كورسەتكىش اناليزى ايەلدەردىڭ مانساپ ساتىسىمەن جوعارىلاۋىنىڭ تەڭ جۇرمەيتىنىن كورسەتتى. ساياسي قىزمەتتەگى ايەلدەردىڭ ۇلەسى 9 پايىزعا تەڭ، "A" كورپۋسىندا - 14 پايىز، ال "B" كورپۋسىندا - 55 پايىز. وسىعان بايلانىستى ءبىزدىڭ الدىمىزدا ايەلدەردى شەشىم قابىلداۋ دەڭگەيىنە دەيىن العا باستىرۋ مىندەتى تۇر»، - دەپ مالىمدەدى ءابدىقالىقوۆا.
ول سونىمەن قاتار، بەس ينستيتۋتسيونالدىق رەفورما بويىنشا شارالاردى ساپالى جۇزەگە اسىرۋدىڭ قازاقستاندى الەمنىڭ 30 دامىعان ەلىنىڭ قاتارىنا كىرگىزۋگە جول بەرەتىنىن ايتتى. سونداي-اق، الماتى اكىمى باۋىرجان بايبەك مەملەكەتتىك حاتشىسىنىڭ پوزيتسياسىمەن كەلىستى. ول ايەلدەردىڭ ەلىمىزدەگى بيزنەس پەن ساياسي سالاداعى ماڭىزىن اتاپ ءوتتى.
«حالىقارالىق تاجىريبە كورسەتىپ بەرگەندەي، 30 ەلدىڭ قاتارىنا ەنگەن ەلدەردە ايەلدەردىڭ ءرولى جوعارى. بۇكىل الەمدەگى حالىقتىڭ باسىم بولىگى - ايەلدەر. ءبىز ءتىپتى شىعىس ەلدەرىندە ايەلدەردىڭ ءرولى تۋرالى ماسەلەنىڭ قايتا بايىپتالعانىن كورىپ وتىرمىز. ولاردا قولداۋ بار، بيزنەستە، ەكونوميكادا جانە وزگە سالالاردا العا باسىپ كەلەدى. بۇل ەلدەردە راسىمەن دە وركەندەۋشىلىك بار. ولار ايەلدەردىڭ قوعامنىڭ مىقتى ءارى ناتيجەلى بولىگى ەكەنىن ءتۇسىندى»، - دەدى بايبەك.
ايتا كەتەيىك، قازاقستاندا ءبىر مەملەكەتتىك قىزمەتكەرگە 170 كە جۋىق ازاماتتان كەلەدى. مالىمەتتەر بويىنشا، مەملەكەتتىك قىزمەتكەرلەردىڭ ەكونوميكالىق تۇرعىدان بەلسەندى حالىقپەن سالىستىرمالى تالداۋى قازاقستاندا 1,1 پايىزعا تەڭ ەكەنىن كورسەتتى. سونىمەن قاتار، ءبىر مەملەكەتتىك قىزمەتكەرگە 171,6 ازاماتتان كەلەتىنى بەلگىلى بولدى. 2015 -جىلدىڭ 1 -قاڭتار كۇنگى جاعداي بويىنشا، مەملەكەتتىك قىزمەتكەرلەردىڭ شتاتتىق سانى 99318 گە تەڭ. ال مەملەكەتتىك قىزمەتكەرلەردىڭ ورتاشا جاسى - 39.
