ا ق ش قازاقستاندا مۇناي ءوندىرىسى تومەندەيدى دەگەن بولجام جاسادى
وسىنداي مالىمەتتەردى ا ق ش ەنەرگەتيكالىق اقپارات باسقارماسى قاراشا ايىنىڭ قىسقامەرزىمدى بولجامدارىندا كەلتىرگەن.
بۇل ازداي، ساراپشىلار 2015 - جىلدىڭ 4 - توقسانىندا قازاقستانداعى مۇناي ءوندىرۋ جۇمىستارى كۇنىنە 1,69 ميلليون باررەلگە دەيىن باسەڭدەيدى دەگەن بولجام جاسادى. دەگەنمەن، تۋرا ءبىر جىلدان سوڭ مۇناي ءوندىرۋ جۇمىستارى شارىقتاۋ شەگىنە دەيىن جەتىپ، ەل كۇنىنە 1,74 ميلليون باررەل مۇناي وندىرەتىن بولادى، دەيدى ماماندار.
ايتا وتەيىك، بۇل مۇناي ءوندىرىسىنىڭ تومەندەۋىنە قاتىستى جاسالعان العاشقى بولجام ەمەس. تاياۋدا و پ ە ك بايانداماسىندا دا وسىعان ۇقساس ساندار كەلتىرگەن. ايتا كەتسەك، بۇگىندە قازاقستان مۇناي قورلارىندا 30 ميلليارد باررەل قارا التىن بار. دەسە دە، ەڭ ءىرى قاشاعان كەن ورنىنىڭ تۇرالاپ تۇرعانىنا ەكى جىلداي بولدى. مۇنداعى مۇناي ءوندىرۋ جۇمىستارى 2016 - جىلى جاندانادى دەگەن بولجام بار.
«استانا» ارناسى
