شەكاراشىلار قازاقستاندىق قىزدى سەكسۋالدىق قۇلدىقتان «كومەكتەسىڭدەر» دەگەن جازۋ ارقىلى قۇتقارىپ قالدى
بيىل 12- قاراشادا شەكارا باقىلاۋىنىڭ قىزمەتكەرلەرى «اقتوبە - ورىنبور» رەيس اۆتوبۋسىنىڭ ادامدارىن تەكسەردى. قازاقستاننىڭ 19 جاستاعى ازاماتشاسىنىڭ قۇجاتتارىن تەكسەرۋ كەزىندە «جايساڭ - اۆتو» باقىلاۋ-وتكىزۋ پۋنكتىنىڭ اسكەريلەرى «پوموگيتە» دەگەن جازۋدى بايقاعان، بۇل جازۋ ونىڭ جولاۋشى بيلەتىندە بولعان.
«قازاقستاندىق شەكاراشىلار ابدىراپ قالمادى. سەبەبى قىز ۇركىپ قالعان، سويلەسپەۋگە تىرىسىپ وتىرعان. شەكاراشىلار قۇجاتتىڭ دۇرىس ەمەستىگىن ايتىپ، قىزدى اۆتوبۋستان ءتۇسىرىپ العان»، - دەپ حابارلادى ق ر ۇ ق ك ش ق باسپا ءسوز قىزمەتىنىڭ وكىلدەرى.
باقىلاۋ-وتكىزۋ پۋنكتىنىڭ عيماراتىنا كىرىپ، ءوزىنىڭ قاۋىپسىز ەكەنىنە كوزىن جەتكىزگەن قىز وقيعانىڭ ءمان-جايىن بايانداپ بەردى.
«ول جۇمىسقا تۇرۋعا بارا جاتقان، وعان ەكى جىگىت جاقىنداپ كەلىپ، ۋاقىتتى سۇراعان، سول كەزدە قىز سومكەسىنەن ۇيالى تەلەفونىن شىعارعان، وسى ۋاقىتتا جىگىتتەر ودان تەلەفونىن تارتىپ الىپ، ۇرىپ، شەتكە الىپ كەتكەن، وڭ قولىنىڭ بىلەگىن ءتىلىپ تاستاعان. ودان كەيىن بەلگىسىزدەر ونىڭ رەسەيگە باراتىن اۆتوبۋسقا بيلەت الۋىن تالاپ ەتكەن. اۆتوبۋستا ونى باقىلاپ وتىراتىن ادامداردىڭ بولاتىنىن ايتقان»، - دەپ حابارلادى باسپا ءسوز قىزمەتىندەگىلەر.
