عالىمدار: سارىمساق ءيىسى ەرلەردى تارتىمدى ەتەدى
شوتلاند جانە چەح عالىمدارى جۇرگىزگەن عىلىمي زەرتتەۋ ناتيجەسىنە سايكەس، سارىمساق ەرلەردى ايەلدەر ءۇشىن تارتىمدى ەتەدى ەكەن.
ءبىراق، بۇل جەردە اڭگىمە ونى جەگەننەن سوڭ اۋىزدان شىعاتىن جاعىمسىز ءيىس تۋرالى ەمەس. ماسەلە ەر ادامنان بولىنەتىن تەردىڭ يىسىندە. سەبەبى كوكونىستىڭ بۇل ءتۇرىن جەگەن سوڭ تەر ءيىسىنىڭ وتكىرلىگى باسەڭدەيدى، دەپ حابارلايدى The Telegraph.
وسى رەتتە تاجىريبەگە قاتىسقان 42 ەر ادامعا ەكى نەمەسە ءتورت دانا سارىمساق باسىن جەۋ ۇسىنىلىپ، ارتىنشا ولاردىڭ تەرلەرىنىڭ ءيىسى ارنايى ادىسپەن جيناقتالعان. سونداي- اق سارىمساق جەۋدەن مۇلدە باس تارتقاندار بولعان. مۇنان سوڭ 82 ايەل ەرلەردەن الىنعان تەر سىنامالارىن يىسكەپ، ءوز باعالارىن بەرىپتى. ناتيجەسىندە سارىمساقتى ەڭ كوپ جەگەن (4 دانا) ەرلەر ءيىسى نازىك جاندىلاردىڭ كوڭىلىنەن شىققان. عالىمدار مۇنى وسىمدىكتىڭ باكتەريالارعا قارسى تۇرا الاتىندىعىمەن ءتۇسىندىردى. ويتكەنى سارىمساقتى كوپ جەگەن ادامنىڭ اعزاسىندا تەر ءيىسىنىڭ جاعىمسىز بولىپ شىعۋىنا سەبەپشى بولاتىن ميكروبتار جويىلادى ەكەن.
