وتاندىق زاۋىتتار شەتەلدىك نارىققا يننوۆاتسيالار ارقىلى شىعادى

استانا. قازاقپارات - قازاقستاننىڭ مەتاللۋرگيالىق كومپانيالارى حالىقارالىق نارىقتا باسەكەگە قابىلەتتى بولىپ تۇر.

ەلىمىزدىڭ مەتاللۋرگيا زاۋىتتارى يننوۆاتسيالىق تەحنولوگيالارىن ماسكەۋدە وتكەن «مەتالل- ەكسپو-2015» كورمەسىندە تانىستىردى، دەپ حابارلادى www.24.kz.

 وعان الەمنىڭ ۇزدىك دەگەن 32 كومپانياسى قاتىستى. اقتوبەنىڭ رەلس ارقالىقتارىن شىعاراتىن زاۋىتى ءوندىرىسىن بىلتىر باستاعان. بۇل - ەلىمىزدە ەكولوگيالىق تەحنولوگيانى العاشقى پايدالانۋشى يننوۆاتسيالىق كاسىپورىن.

وسى كورمەدە شەتەلدىك كومپانيالاردىڭ قىزىعۋشىلىعىن تۋدىرعان تاعى ءبىر وتاندىق ءوندىرىس - مەتاللۋرگيالىق پەشتەرگە سۋمەن سالقىنداتقىش ەلەمەنتتەردى قۇياتىن تەحنولوگيانى ەنگىزگەن «كاستينگ» كومپانياسى. زاۋىت ءوز ونىمدەرىمەن رەسەي، قىرعىزستان، وزبەكستان، يران، تۇركيا، وڭتۇستىك كورەيا، انگليا، شوتلانديا، گەرمانيا مەن ا ق ش- تى قامتاماسىز ەتەدى.

«ءبىزدىڭ ونىمدەرىمىز مەتاللۋرگيالىق وندىرىستە سۇرانىسقا يە. تەحنولوگيامىز ولاردىڭ باعاسىن ارزان ەتىپ شىعارۋعا سەپتىگىن تيگىزىپ وتىر. بيىلعى جىلى ءبىز ايىنا 300 تونناعا دەيىن اليۋميني قورىتاتىن ءوندىرىسىمىزدى جاڭعىرتتىق. ءبىزدىڭ تۇراقتى جۇمىس ىستەيتىن تاپسىرىستاردى جەتكىزۋشىلەرىمىز بار، ايىنا 150 توننا مەتالل قورىتۋعا كەلىسىمشارت جاساستىق» ، - دەيدى «كاستينگ» كومپانياسىنىڭ ديرەكتورى ۆيتالي چيەۆتايەۆ.

 «اقتوبە رەلس زاۋىتى» - ول ەلباسى تاپسىرماسىمەن ۇدەمەلى يندۋستريالدى- يننوۆاتسيالىق دامۋ باعدارلاماسى بويىنشا جۇزەگە اسىرۋ نەگىزىندە پايدا بولعان جوبا. بۇگىنگى تاڭدا ءبىزدىڭ ونىمگە وزبەكستان، قىرعىزستان، تاجىكستان، تۇرىكمەنستان، گرۋزيا، ارمەنيا، ازەربايجان سەكىلدى ەلدەر قىزىعۋشىلىق تانىتىپ وتىر. وسى كورمە بارىسىندا سولارمەن كەلىسىم جۇرگىزىلدى»، - دەپ اتاپ ءوتتى ارز ماركەتينگ ءبولىمىنىڭ جەتەكشى مامانى قايرات داۋلەت.