الماتىدا توي كورتەجىنىڭ قۇرامىندا جول قوزعالىسى ەرەجەسىن بۇزعان كولىك جۇرگىزۋشىلەرى جاۋاپقا تارتىلدى
بۇل تۋرالى بۇگىن الماتى ق. ءى ءى د باسپا ءسوز قىزمەتىنەن حابارلادى.
«بۇعان دەيىن ءمالىم بولعانىنداي، پوليتسيا قىزمەتكەرلەرى جول قوزعالىسى ەرەجەسىن ورەسكەل تۇردە بۇزعان نەكەلىك شەرۋگە قاتىسۋشىلاردى جاۋاپقا تارتتى. ەستەرىڭىزگە سالا كەتەلىك، 2015 -جىلدىڭ 7- قاراشاسى كۇنى كەشكى ساعات بەستان اسقان ۋاقىتتا بايزاقوۆ كوشەسىنىڭ شىعىس جاعىنا تامان، اباي داڭعىلى بويىندا نەكە شەرۋى تاراپىنان جول قوزعالىسى ەرەجەسى بۇزىلدى»، - دەلىنگەن حابارلامادا.
پوليتسيا قىزمەتكەرلەرى وسى شەرۋگە قاتىستى بەينەتاسپانى مۇقيات ساراپتاي كەلە، ونداعى اۆتوكولىك جۇرگىزۋشىلەرىنىڭ بارلىعىنىڭ اتى-جوندەرىن انىقتادى. بۇگىنگى تاڭدا بارلىق ءتورت اۆتوكولىك جۇرگىزۋشىسى جول قوزعالىسى ەرەجەسىن بۇزعاندارى ءۇشىن اكىمشىىلىك جاۋاپقا تارتىلدى.
ناقتى ايتار بولساق:
1. «تويوتا فورانەر» اۆتوكولىگىنىڭ جۇرگىزۋشىسى ن. ءسۇيىنباي ق ر اكىمشىلىك قۇقىق بۇزۋشىلىق كودەكسىنىڭ 596- بابىنىڭ 3- تارماعى بويىنشا (قارسى جولاققا شىعىپ كەتۋ) - 1 جىل مەرزىمگە كولىك جۇرگىزۋ قۇقىعىنان ايرىلدى.
2. «تويوتا لەند كرۋزەر» اۆتوكولىگىنىڭ جۇرگىزۋشىسى ن. ناربايەۆقا ق ر اكىمشىلىك قۇقىق بۇزۋشىلىق كودەكسىنىڭ 601- بابىنىڭ 1- تارماعى بويىنشا (قويىلعان بەلگىلەرگە قاتىستى ەرەجە بۇزۋ) - 5 ا ە ك كولەمىندە ايىپپۇل سالىندى.
3. «مەرسەدەس بەنس» اۆتوكولىگىنىڭ جۇرگىزۋشىسى بايباتىر ە. ق ر اكىمشىلىك قۇقىق بۇزۋشىلىق كودەكسىنىڭ 595- بابىنىڭ 1- تارماعى (ارتقا قاراي ءجۇرۋ)، 595- بابىنىڭ 1 -تارماعى (مانيەۆر جاساۋ ەرەجەسىن بۇزۋ) جانە 606- بابىنىڭ 1- تارماعى بويىنشا (اپاتتى جاعداي تۋعىزۋ) - 15 ا ە ك كولەمىندە ايىپپۇل سالىندى.
4. «مەرسەدەس بەنتس» اۆتوكولىگىنىڭ جۇرگىزۋشىسى ساركيسيان ا. ق ر اكىمشىلىك قۇقىق بۇزۋشىلىق كودەكسىنىڭ 95- بابىنىڭ 1- تارماعى بويىنشا (مانيەۆر جاساۋ ەرەجەسىن بۇزۋ) 5 ا ە ك كولەمىندە ايىپپۇل سالىندى.
اۆتور: جاپپاربەرگەن ايبوتا
