قازاقستان ازاماتى بولۋدى ارماندايتىن كۋبالىق نازاربايەۆقا حات جازدى
كۋبا ازاماتى گۋستاۆو سۋبيساررەتا. تالدىقورعان، 2015-جىلدىڭ قاراشاسى
1991-جىلى تالدىقورعاندىق بويجەتكەنگە ۇيلەنىپ، قازاقستانعا قونىستانعان گۋستاۆو سۋبيساررەتانىڭ جاسى 48 دە. كۋبالىق جىگىت بولاشاق كەلىنشەگىمەن ۋكراينانىڭ ودەسسا قالاسىندا ينجەنەر-سينوپتيك ماماندىعىن وقىپ جۇرگەندە تانىسقان.
ونىڭ ايتۋىنشا، قازاقستاننىڭ پروۆينتسيالىق قالاسىنداعى جاڭا ءومىرى اۋەلى تاماشا باستالعان. تالدىقورعان اۋەجايىنا ينجەنەر بولىپ ورنالاسىپ، قىزى يەۆگەنيا دۇنيەگە كەلگەن. ءبىراق « كەيىن وتباسىمنىڭ شىرقى بۇزىلدى» دەگەن گۋستاۆو ايەلىمەن اجىراسىپ، باعىن سىناپ كورمەككە الماتىعا كەتكەنىن ايتادى.
كۋبالىق ازامات الماتىدا ساۋدا-ساتتىقپەن اينالىسۋعا تىرىسقان، ءبىراق ول «سەرىكتەستەرىم الداپ كەتىپ، ءبىر تيىنسىز قالدىم» دەيدى. ءدال سول تۇستا كۋبالىق ءتولقۇجاتىن اۋىستىراتىن مەرزىم كەلگەن، ءبىراق گۋستاۆونىڭ ايتۋىنشا، قۇجاتتى ۋاقىتىندا اۋىستىرۋعا اقشاسى بولماي، زاڭسىز ميگرانتقا اينالعان.
«ول كەزدە كۋبا ەلشىلىگى استاناعا كوشىپ كەتكەن بولاتىن. جولعا اقشام بولمادى. جاڭا ءتولقۇجات الۋ ءۇشىن 300 دوللار كەرەك ەدى. بۇل ايەلىممەن اجىراسىپ، وعان تۇرمىستاعى قيىندىقتار قوسىلىپ، جۇدەپ-جاداپ جۇرگەن كەزىم بولاتىن. كوپكە دەيىن دەنى دۇرىس جۇمىس تاپپاي ءجۇردىم. ال كەيىن مەرزىمى ءوتىپ كەتكەن تولقۇجاتپەن مەنى ەشكىم جۇمىسقا العىسى كەلمەدى. بيزنەسپەن اينالىسپاق بولعان ارەكەتتەن دە تۇك شىقپادى»، - دەيدى ول.
شاراسىزدىقتان ەڭسەم ءتۇسىپ كەتتتى، ونىڭ ۇستىنە تۇراتىن جەرىم دە جوق
گۋستاۆونىڭ ايتۋىنشا، 2011-جىلدان بەرى ول سوت شەشىمىمەن قازاقستاننان دەپورتاتسيالانۋى ءتيىس زاڭسىز ميگرانت بولىپ ءجۇر. ول «شاراسىزدىقتان ەڭسەم ءتۇسىپ كەتتى، ونىڭ ۇستىنە تۇراتىن جەرىم دە جوق» دەيدى. جيعان-تەرگەن دۇنيە-مۇلكىن ءبىرىنشى ايەلىنە قالدىرعانىن ايتادى.
قازىر ونى ۇلكەن قىزى ۋاقىتشا پانالاتىپ وتىر. شەتەلدىك ازامات قىزى، كۇيەۋبالاسى، ولاردىڭ كىشكەنتاي ەكى بالاسىمەن بىرگە جاتاقحانانىڭ ءبىر بولمەسىندە تۇرادى ءارى «دەنساۋلىعىم دا سىر بەرە باستادى» دەپ شاعىمداندى.
«ونىڭ دەنساۋلىعىنا الاڭداپ، اۋىرىپ قالا ما دەپ ۋايىمدايمىن. ءوزى كەز-كەلگەن ساتتە دەپورتاتسيالاپ جىبەرۋى مۇمكىن دەپ قورقادى. ءتىپتى كىمگە بارىپ كومەك سۇرارىمدى بىلمەيمىن»، - دەيدى ونىڭ قىزى يەۆگەنيا سۋبيساررەتا.
گۋستاۆو سۋبيساررەتا كومەك سۇراپ، ەل پرەزيدەنتى ن. ءا. نازاربايەۆقا حات جازا باستاعان
الماتى وبلىسى كوشى-قون پوليتسياسى قىزمەتكەرلەرى گۋستاۆو سۋبيساررەتانى تانيدى. زاڭدى كۇشىنە ەنگەن سوت شەشىمىنە سايكەس، ەندى ونى تۋعان ەلىنە دەپورتاتسيالاماق. پوليتسەيلەر ونىڭ ءجۇرىس-تۇرىسىن ۇنەمى باقىلاپ وتىرعاندارىن ايتادى.
كۋبا ازاماتىنىڭ تاعدىرى قازاقستانداعى ادام قۇقىعى بيۋروسىنىڭ نازارىنا ىلىككەن. بيۋرو ديرەكتورىنىڭ ورىنباسارى دەنيس دجيۆاگا «ۇيىم اۋەلى گۋستاۆوعا كۋبالىق ءتولقۇجاتىن قالپىنا كەلتىرۋگە كومەكتەسەدى، ال كەيىن قازاقستان ازاماتتىعىن الۋ ماسەلەسىن شەشەمىز» دەيدى.
گۋستاۆو سۋبيساررەتا كومەك سۇراپ، ەل پرەزيدەنتى ن. ءا. نازاربايەۆقا حات جازا باستاعان. ول پرەزيدەنتكە قازاقستاننىڭ تولىق قۇقىلى ازاماتى بولۋدى ارماندايتىنىن ايتقىسى كەلەدى. سۋبيساررەتا ونىسىنىڭ بىرنەشە سەبەبىن اتايدى.
بىرىنشىدەن، قازاقستاندا ەكى قىزى مەن جيەن نەمەرەلەرى تۇرادى. ەكىنشىدەن، كۋباعا قاراعاندا، مۇندا مۇمكىندىك كوبىرەك دەپ سانايدى. ال ۇشىنشىدەن، تاريحي وتانىندا تۋىستارىنان ەشكىم قالماعان، ەندى ول جاققا ورالعىسى كەلمەيدى.
«ازاتتىق»
