تاتتىمبەت قازانعاپ ۇلىنىڭ كونە سۋرەتى مەن حاتى تابىلدى

استانا. قازاقپارات - شەرتپە كۇيدىڭ شەبەرى تاتتىمبەت قازانعاپ ۇلىنىڭ قۇرمانعازى ساعىرباي ۇلىمەن تۇسكەن كونە سۋرەتى تابىلدى.

تاريحي جادىگەر وسى ۋاقىتقا دەيىن كۇيشىنىڭ ومبى قالاسىنا قونىستانعان ساناۋلى ۇرپاقتارىنىڭ بىرىندە ساقتالىپ كەلگەن. بۇل تۋرالى ومبى قالاسىندا تۇراتىن كۇيشىنىڭ بەسىنشى ۇرپاعى، 66 جاستاعى مولدابەك زىكىرشين ايتتى دەپ حابارلايدى ق ر ۇلتتىق مۇراعاتتىڭ قوعاممەن بايلانىس جونىندەگى قىزمەتى.

تاريحي سۋرەت تۋرالى مولدابەك زىكىرشين ۇزاق ۋاقىتتان بەرى ەشكىمگە ايتپاعان. ايتۋىنشا، ول سۋرەتتى اتاسى زىكىرشى ومىردەن وتەر الدىندا اماناتتاپ، اكەسى تورەمۇراتقا جوعالتىپ الماۋىن قاتتى تاپسىرعان. ونىڭ اتاسى زىكىرشى قازانعاپوۆ 1948-جىلى سەمەي قالاسىندا سۇزەك سىرقاتىمەن ومىردەن وتكەن.

قازىر بۇل سۋرەتتى ەلگە جەتكىزىپ، ۇلتتىق مۋزەيگە تاپسىرۋ ءۇشىن داۋلەسكەر كۇيشىنىڭ ۇرپاقتارىمەن كەلىسىم جۇرگىزىلۋدە. سۋرەتتە قيلى زاماندا قۋعىن كورىپ، ارقاداعى تاتتىمبەت قازانعاپ ۇلىن ساعالاپ كەلگەن قۇرمانعازى ساعىربايلى بەينەلەنگەن. كونە سۋرەتتىڭ تۇسىرىلگەنىنە ءبىر جارىم عاسىرعا جۋىق ۋاقىت بولسا دا، ۇقىپتى ساقتالىپتى.

سونىمەن قاتار، مولدابەك زىكىرشين تاتتىمبەت كۇيشىنىڭ قارقارالى ۋەزىنىڭ اعا سۇلتانى قۇنانباي وسكەنبايەۆقا كەنەسارى قاسىم ۇلىنا كومەك بەرۋگە ات سالىسۋ تۋرالى 1849-جىلى جازعان تاريحي حاتىن ساقتاپ كەلىپتى. اعا سۇلتانعا جازىلعان قوس پاراق حات ۋەزدى بيلەگەن بيگە دەر كەزىندە جەتپەي قالىپ، تاتتىمبەتتىڭ وزىنە قايتىپ كەلگەن. توتە جازۋمەن جازىلعان كونە حاتتا كەنەسارى حانعا كومەك كورسەتۋدەن بولەك، مالدىڭ جازعى جايىلىمىنىڭ تارىلىپ بارا جاتقاندىعى مەن قارقارالىنىڭ توڭىرەگىنە ورىستاردىڭ جاپپاي قونىستانۋىنا نازارىلىق بىلدىرگەن ەلدىڭ مۇڭى ايتىلعان.

الداعى كۇندە بۇل قوس جادىگەر ەلگە جەتكىزىلىپ، استاناداعى ۇلتتىق مۇراجايعا جايعاساتىن بولادى. قازىر ەلىمىزدىڭ زيالى قاۋىم وكىلدەرىمەن بىرلەسىپ، قىمبات قازىنانى ەلگە الدىرۋ ماسەلەسى تۋرالى بەيرەسمي كەلىسسوز جۇمىستارى اتقارىلۋدا. سەبەبى، مۇنداي قىمبات قازىنانى ومبى قالاسىنداعى ورتا ازيا مۇراجايى ساتىپ الۋعا نيەت ءبىلدىرىپ وتىر.

وسىدان 9 جىل بۇرىن ابىلاي حان مەن قازىبەك ءبيدىڭ شاپانى، سونداي-اق، بوگەنباي باتىردىڭ سىنعان سەمسەر قىلىشى ولاردىڭ ۇرپاقتارىنان مەملەكەت يەلەگىنە قابىلدانعان ەدى.

ول ۋاقىتتا مۇنداي يگى ىسكە قوعام قايراتكەرلەرى مىرزاتاي جولداسبەكوۆ، ءابىش كەكىلبايەۆ سىندى ەل اعالارى جۇمىلدىرىلعان-تىن. قازىرگى تاڭدا، اتالعان ابىز اقساقالداردىڭ الىس جولعا شىعۋعا دەنساۋلىعى سىر بەرۋىنە بايلانىستى اكادەميك تۇرسىن جۇرتباي، اقىن ءجۇرسىن ەرمان جانە ايتىسكەر اقىن امانجول التايەۆ سىندى ەلدىڭ يگى جاقسىلارى جۇمىلدىرىلىپ وتىر.

Baq.kz