قازاقستاندىق ساياحاتشىلار شەتەلدە دەمالۋدان باس تارتۋدا
ال بيىل بۇل كورسەتكىش تاعى بىرنەشە ەسەگە ازايعان. تۋريستىك اگەنتتىكتەر تۇتىنۋشىلاردى جوعالتپاۋ ءۇشىن بارىن سالۋدا. ءبىرى ءتۇرلى جەڭىلدىكتەر ۇيىمداستىرسا، ەندى ءبىرى جەدەل جولدامالار ساتىپ الەككە تۇسۋدە. قازاقستاندىقتار كۇزدىڭ قارا سۋىعىندا جىلى جاققا بارىپ دەمالعىلارى كەلەدى. قازىر تايلاند، گوا، دۋباي مەن مىسىر ەلى ازاماتتارىمىزدىڭ دەمالىستارىن وتكىزەتىن ەلدەردىڭ كوشىن باستاپ تۇر.
بيىلدىڭ وزىندە مىڭداعان ازامات جاڭا جىلدى جىلى جاقتا قارسى الۋدى جوسپارلاپ قويعان. الايدا ولاردىڭ سانى وتكەن جىلمەن سالىستىرعاندا %60-70 عا دەيىن ازايىپ كەتكەن. تۋريستىك اگەنتتىك وكىلدەرىنىڭ ايتۋىنشا، قازاقستاندىقتاردىڭ شەتەلدە دەمالۋىنا دوللاردىڭ قىمباتتاۋى قولبايلاۋ بولىپ تۇر.
ايگۇل ءساتجانوۆا، قازاقستان تۋريستىك قاۋىمداستىعىنىڭ مۇشەسى:
- كۇزگى- قىسقى دەمالىستاردى ۇيىمداستىرۋ كەزىندە قيىندىقتار بار. ءبىزدىڭ كومپانيا 4 جىل قاتارىنان تاۋ شاڭعىسى كۋرورتتارىنا تۋريستەردى چارتەرلىك رەيستەرمەن جەتكىزەتىن. جولدامالار 2-3-ايدىڭ ىشىندە ءوتىپ كەتەتىن. بيىل سۇرانىستىڭ جوقتىعىنان كوپتەگەن رەيستى توقتاتۋعا تۋرا كەلدى. بىلتىرعى جىلمەن سالىستىرعاندا چارتەرلىك رەيستەردىڭ ءوزى %30-40 عا دەيىن تومەندەدى. قازىر دەمالۋشىلار الدىمەن باعاعا ءمان بەرەدى. كەيىن اسىقپاي تاڭداۋ جاسايدى. الەمدى شارپىعان ەكونوميكالىق داعدارىس تۋريستىك اگەنتتىكتەرگە دە وڭاي سوقپاي تۇر. زامان اعىمىنا قاراي بۇلار دا وزىنشە امالدايدى. قىمبات جولدامانى قالتاسى كوتەرمەيتىن تۇرعىندار ءۇشىن ءتيىمدى ءتاسىل ويلاپ تاپقان. ماسەلەن، قىمبات قوناق ءۇي، ءىشىپ- جەۋگە كەتەتىن شىعىنداردى قىسقارتىپ، باعاسى قولجەتىمدى ەلدەرگە ساياحات ۇيىمداستىرىپ جاتىر.
انارگۇل يسلياموۆا، تۋريستىك كومپانيا ديرەكتورى:
- ءبىز وسى جاعدايعا دايىن بولدىق. تۋريستىك سالا سۇرانىستىڭ ازايۋىنا وراي بەيىمدەلدى. بيىلدىڭ وزىندە ساياحاتتاۋشىلار %30-40 عا ازايدى. ءبىز قول قۋسىرىپ وتىرعان جوقپىز. جولاۋشىلاردىڭ باعىتتارىن وزگەرتۋىنە جاعداي جاساپ، نەعۇرلىم ارزان ەلدەرگە دەمالۋعا كەڭەس بەرەمىز.
مامانداردىڭ ايتۋىنشا، بيىل ەلىمىزدەگى شيپاجايلار مەن دەمالىس ورىندارىنىڭ تامىرىنا قان جۇگىرمەك. ويتكەنى قىمبات جولدامانى قالتالارى كوتەرمەيتىندەر جەرگىلىكتى تىنىعۋ ورىندارىنا اعىلادى. الەمدىك داعدارىس وتاندىق تۋريزمدى دامىتۋعا تاپتىرماس مۇمكىندىك بەرىپ وتىر.
ارينە، باستىسى - ەلىمىزدەگى تىنىعۋ ورىندارىنىڭ باسەكەگە قابىلەتتى بولۋى. سونداي- اق قىزمەت كورسەتۋ ساپاسى مەن ۇيىمداستىرۋ جۇمىستارىنىڭ تالاپتارعا ساي بولۋى ءتيىس.
انار بازمۇحامەتوۆا، قالا تۇرعىنى:
- ءبىز ەكى جىل قاتارىنان تايلاندتا دەمالدىق. ەكى ادامعا جولداما 262 مىڭ تەڭگە بولاتىن. ياعني ءبىر ادامعا 600 دوللاردىڭ كولەمىندە ەدى. بيىل دا وسى باعا. ءبىراق دوللاردىڭ كۋرسى جوعارى. مۇنداي جاعدايدا شەتەلگە شىعۋ مۇمكىن ەمەس. سوندىقتان الداعى ۋاقىتتا ءوز ەلىمىزدەگى دەمالىس ورىندارىنىڭ بىرىندە تىنىعامىن دەپ جوسپارلاپ وتىرمىن.
قازىر كەيبىر شەتەلدىك ساياحاتشىلار رەسەيلىك ۇشاقتىڭ اپاتقا ۇشىراۋى سەبەپتى مىسىرعا اياق باسپايدى. ال قازاقستاندىقتاردى كەرىسىنشە بۇل جاعداي ويلاندىرماعانعا ۇقسايدى. سەبەبى شارم- ەل- شەيح دەمالىس ايماعىنا سۇرانىس ازايماعان. قازىر جولاۋشىلار بۇل ەلگە الماتىدان تىكەلەي اتتانىپ جاتىر. 7 -قاراشا كۇنى وڭتۇستىك استانادان 200 دەن استام قازاقستاندىق جىلى جاققا باعىت العان. ال ازاماتتىق اۆياتسيا وكىلدەرى قاۋىپسىزدىك ماقساتىندا جولاۋشىلاردىڭ جۇكتەرىن ءجىتى تەكسەرۋمەن شەكتەلۋدە.
www.24.kz
