تالدىقورعان اۋەجايىنا «قازاق ەير» اۋە كومپانياسىنىڭ العاشقى ۇشاعى قوندى - فوتو
ەكيپاج مۇشەلەرى مەن العاشقى رەيستىڭ جولاۋشىلارى بولعان ارداگەرلەر قاۋىمىن تالدىقورعاندىقتار شاشۋ شاشىپ، ۇلكەن قوشامەتپەن قارسى الدى.
- بۇل شارا ەلباسىنىڭ وتكەن جىلعى ساپارىندا بەرگەن تاپسىرماسى اياسىندا، سونداي-اق كولىك جۇيەسى ينفراقۇرىلىمىن دامىتۋدىڭ مەملەكەتتىك باعدارلاماسى شەڭبەرىندە، وڭىرلەردى دامىتۋ ماقساتىندا ىسكە اسىرىلدى. مەملەكەتتىك باعدارلاما نەگىزىندە حالىقتى تاسىمالداۋ قىزمەتىنىڭ ساپاسى جاقسارىپ، ىڭعايلى، جايلى ۇشاق بەرىلىپ وتىر.
تالدىقورعان قالاسىنا وسىنداي جاڭا ۇلگىدەگى ۇشاقتىڭ ۇشۋى ۋاقىت تالابى دەپ بىلەمىز. بۇگىنگى قۋانىشتارىڭىز قۇتتى بولسىن! ەلىمىز امان بولىپ، جاقسى ىستەر، يگى باستامالار كوبەيە بەرسىن، - دەدى تۇرعىنداردى، زور قۋانىشىمەن قۇتتىقتاعان وبلىس باسشىسى ا. باتالوۆ.
سونىمەن قاتار وبلىس باسشىسى تالدىقورعان اۋەجايىن جاڭا، زاماناۋي كەيىپكە كەلتىرۋ بولاشاقتا ونىڭ حالىقارالىق مارتەبەگە يە بولۋىنا، الماتى وبلىسىنىڭ ورتالىعىنان قىتايعا، رەسەي مەن قىرعىزستانعا رەيستىڭ قاتىناۋىنا مۇمكىندىك بەرەتىنىن اتاپ ءوتتى.
مۇنان سوڭ «Qazaq Air» اۋە كومپانياسىنىڭ باسشىسى بلەر پوللوك مىرزا قالا حالقىنىڭ قوناقجايلىعىنا ريزاشىلىعىن ءبىلدىرىپ، وبلىس باسشىلىعىنا، اۋەجاي ۇجىمىنا العىس ايتتى. بۇل - قازاقستان بويىنشا سوڭعى ەكى ايدا «Qazaq Air» اشىپ وتىرعان ون ەكىنشى جاڭا رەيس ەكەن. الداعى ۋاقىتتا سۇرانىس ارتاتىن بولسا، سوعان سايكەس رەيستەردىڭ سانىن دا ۇلعايتۋعا مۇمكىندىك بار ەكەنىن جەتكىزدى.
بۇگىنگە دەيىن تالدىقورعان اۋەجايىندا كەڭەستىك كەزەڭنەن قالعان تار، مورالدىك تۇرعىدان ەسكىرگەن «ياك-40» ۇشاعى قىزمەت اتقارىپ كەلگەن. ەندى تالدىقورعان ءوڭىرىنىڭ تۇرعىندارى استانا قالاسىنا بارلىق قولايلى جاعدايلار قاراستىرىلعان زاماناۋي ۇشاقپەن قاتىنايتىن بولادى. رەيستەر اپتاسىنا ءۇش رەت، ياعني دۇيسەنبى، سارسەنبى جانە جۇما كۇندەرى ۇشادى. جاڭا ۇشاق 78 جولاۋشىعا ارنالعان.
اۆياكومپانيا استانامەن عانا ەمەس، تالدىقورعاننىڭ الماتى قالاسىمەن دە اۋە قاتىناسىنا قىزمەت كورسەتپەك. الماتى مەن تالدىقورعان ارالىعىنا جولاۋشىلار 35 مينۋتتا جەتسە، ەلوردامىز بەن وبلىس ورتالىعى ارالىعىنىڭ ۇزاقتىعى - ورتا ەسەپپەن 1 ساعات 20 مينۋت.
تالدىقورعان اۋەجايىنىڭ ۇشۋ جانە قونۋ الاڭىن جاڭعىرتۋ مەن جاڭا اەروناۆيگاتسيالىق كەشەن ورناتۋعا 11 ميلليارد تەڭگە ءبولىنىپ، بەلگىلەنگەن جۇمىستار تولىعىمەن اياقتالدى. بۇگىنگى كۇنى اۋەجايدى حالىقارالىق تالاپتارعا ساي كۇردەلى جوندەۋ مەن قوسىمشا عيماراتتاردىڭ قۇرىلىسىن جۇرگىزۋ قولعا الىنۋدا. جوندەۋ جۇمىستارى 2016 -جىلدىڭ ءبىرىنشى جارتىسىندا اياقتالادى دەپ جوسپارلانىپ وتىر.
سونىمەن قاتار وبلىستا تۋريزمدى دامىتۋ ماقساتىندا ءۇشارال قالاسىنا اەروۆوكزال سالۋ مەن ۇشاق قاتىناسىن اشۋعا باعىتتالعان جۇمىستار جۇرگىزىلىپ جاتىر.
