بەيجىڭدە قىتاي ايماعىنان قازاقستانعا وندىرىستىك قۋاتتىڭ ءبىر بولىگىن كوشىرۋ جونىندەگى باعدارلاما تالقىلانادى
بۇل تۋرالى ەلوردادا ەۋرازيالىق ىقپالداستىقتىڭ نەگىزگى ماسەلەلەرىن تالقىلاۋعا ارنالعان استانا كلۋبىنىڭ I وتىرىسىندا ق ر پرەمەر-ءمينيسترى كارىم ءماسىموۆ ءمالىم ەتتى.
«ءبىز وسى باعىتتا جۇمىس جاساپ جاتىرمىز. 2014 -جىلدىڭ جەلتوقسانىندا ق ح ر پرەمەر-ءمينيسترىنىڭ قازاقستانعا ساپارى بارىسىندا قىتاي ايماعىنان قازاقستانعا وندىرىستىك قۋاتتىڭ ءبىر بولىگىن كوشىرۋ جونىندە باعدارلامانى قابىلدادىق. بۇل باعدارلاما قىتاي ءۇشىن دە، قازاقستان ءۇشىن دە ءتيىمدى دەپ ەسەپتەيمىن. ءبىر ايدان سوڭ، جەلتوقسان ايىندا مەن بەيجىڭگە ىسساپارمەن بارامىن جانە وسى باعدارلامانى ءىس جۇزىنە اسىرۋ جونىندە تالقىلاۋلار جۇرگىزەمىن»، - دەدى ول.
ول سونداي-اق اتالعان باعدارلامانىڭ قازاقستانعا قانداي پايدا اكەلەتىندىگىن دە ايتىپ ءوتتى.
«قازاقستانعا نەگە ول ءتيىمدى؟! ق ح ر ساياساتىنىڭ وزگەرۋىنەن، اتاپ ايتقاندا، جاڭا جولدى تاڭداۋى، سونىمەن قاتار قىتايدا وندىرىستىك قۋاتتىڭ تىم كوپتىگىنەن سوڭعى 15-20 جىلدا قىتايعا شيكىزات ساتۋدان كورگەن پايدامىز بۇرىنعىداي بولمايدى»، - دەدى ك. ءماسىموۆ.
«بۇل ءسوزىم ناقتى سانداردان كورىنىپ تۇر. سوندىقتان شيكىزاتتىق تاۋارلارىمىزدىڭ قىتايعا ەكسپورتتالۋى قيىنداي تۇسپەك. سوندىقتان قوسىمشا وڭدەلگەن تاۋارلاردى شىعاراتىن وندىرىستىك قۋاتتاردى قازاقستانعا كوشىرۋ قازاقستاننىڭ عانا ەمەس، ق ح ر- دىڭ دا مۇددەسىنە ساي كەلەدى»، - دەپ اتاپ ءوتتى پرەمەر- مينيستر.
ونىڭ ايتۋىنشا، وسىنداي باعدارلامالاردى ق ح ر تاراپى وزگە دە دامۋشى ەلدەرمەن بىرگە جۇزەگە اسىرۋدى جوسپارلاۋدا.
«قىتاي ۇكىمەتىمەن تىلدەسكەنىمدە ولار قازاقستان ۇلگىسىن الا وتىرىپ، اتالمىش باعدارلامانى باسقا دا ەلدەرگە ەنگىزبەك. سوندىقتان بۇل باعدارلامانىڭ بولاشاعىنا ۇلكەن ءۇمىت ارتامىن جانە ونىڭ ءبىزدىڭ ەلدەگى بولاشاعى زور»، - دەپ ءتۇيدى ءسوزىن ۇكىمەت باسشىسى.
اۆتور: جاسۇلان جولدىبايەۆ
