مەن عارىشقا تەك قازاقستاننىڭ تولقۇجاتىمەن ۇشقىم كەلدى - ا. ايىمبەتوۆ - فوتو
بۇل كەزدەسۋ قازاقتان شىققان ءۇشىنشى، «قازعارىشتىڭ» ءبىرىنشى عارىشكەرىنىڭ حالقارالىق عارىش ستانساسىنا ساپارىنا ارنالدى.
ايدىن ايىمبەتوۆ ءوزىنىڭ حالىقارالىق عارىش ستانساسىندا وتكىزگەن كۇندەرى تۋرالى، عارىشقا ساپارى تۋرالى ستۋدەنتتەرگە ايتىپ بەردى. سونداي-اق ول وقۋ ورنىنداعى نانو-زەرتحانا مەن عىلىمي- تەحنيكالىق پاركتىڭ جۇمىسىمەن تانىسىپ، بىرەگەي كىتاپحانادا بولدى.
«ايدىن اقان ۇلىنىڭ ءبىزدىڭ جوو ۇجىمىمەن كەزدەسىپ جاتقانى وتە قۋانىشتى جايت. قازاق ۇلتتىق ۋنيۆەرسيتەتى ەلىمىزدىڭ عارىش تەحنولوگياسى عىلىمىنا ۇلەس قوسىپ جاتقان وقۋ ورنى. مەملەكەتتىك دەڭگەيدە عارىش سالاسىنا قاجەتتى ماماندار دايىندايتىن ءبىلىم وشاعى. وقۋ ورنىنىڭ عالىمدارى ويلاپ تاپقان «كۋلون پلازمالىق كريستالى» جوباسى عارىشكەردىڭ عىلىمي باعدارلاماسىنا ەندى»، - دەدى ۋنيۆەرسيتەت رەكتورى عالىمقايىر مۇتانوۆ.
ونىڭ ايتۋىنشا، قازىر ۋنيۆەرسيتەت عالىمدارى ەكى سپۋتنيك ويلاپ تاپتى.
«فارابي-1» نانو-سپۋتنيگى مەن سالماعى 50 كەلى بولاتىن جاساندى سەرىك ستۋدەنتتەردىڭ قاتىسۋىمەن جاسالعان.
«مەنى ەلىمىزدىڭ ەڭ بەدەلدى وقۋ ورنىنا شاقىرعانىنا وتە قۋانىشتىمىن. «كۋلون پلازمالىق كريستالى» عىلىمي جوباسىن جۇزەگە اسىرۋعا قاتىسقانىم ماعان ۇلكەن مارتەبە. عارىشقا مەملەكەت باسشىسىنىڭ شەشىمى مەن قولداۋىنىڭ ارقاسىندا ۇشتىم. ۇشۋ بارىسىندا اۋقىمدى عىلىمي باعدارلاما جاسالدى. قاز ۇ ۋ جوباسى بويىنشا زاريادتالعان ميكروبولشەكتەردىڭ سالماقسىزدىق كەزىندە ءارى ءتۇرلى ماگنيتتىك كەرنەۋ اياسىندا ءبىر- بىرىمەن ىقپالداسۋى زەرتتەلدى. زەرتتەۋ ناتيجەلەرى بىرنەشە وبلىستا پايدالانىلادى. نۇرسۇلتان نازاربايەۆ قازاقستاننىڭ عارىش سالاسى عىلىمىنىڭ دامۋىنا بار جاعداي جاسالاتىنىن ايتتى»، - دەدى ا. ايىمبەتوۆ.
بالا كەزىندە ايدىن ايىمبەتوۆ تە باسقا بالالار سياقتى عارىشقا ۇشىپ، بەلگىسىز عالامشارلاردى، جۇلدىزداردى اشۋدى ارمانداعان.
«قازىر دە بۇل ارمان كوكەيىمدە قالىپ وتىر. اي عىلىمي بازاسىن قالىپتاستىرۋعا قاتىسقىم كەلەدى. مارسقا ۇشقىم كەلەدى. بۇنىڭ بارلىعى ەرتەڭ بولمايدى. «اي باعدارلاماسى» 10-20 جىلدان كەيىن بولادى. بۇل سىزدەر ءۇشىن تاپتىرماس مۇمكىندىك»، - دەدى ول.
ستۋدەنتتەردىڭ ءبىرى قازاق عارىش سالاسىنداعى كۇردەلى كەزەڭدە عارىشكەرلەردىڭ بارلىعى رەسەي ازاماتتىعىن الىپ، رەسەيدەن ۇشۋعا تالپىنعان كەزدە «سىزدە ونداي وي بولعان جوق پا؟» دەگەن سۇراق قويدى.
«قازاقستان عارىشكەرىنىڭ ساپارى كەيىنگى قالدىرىلعان كەزدە دە مەن ايتەۋىر ءبىر ۇشاتىنىما سەندىم. مەن عارىشقا تەك قازاقستاننىڭ تولقۇجاتىمەن ۇشقىم كەلدى. مەن ءۇشىن پاتريوتتىق - ول وتانىم، وتباسىم، سۇيىكتى قالام، تۋعان ەلىم. عارىشقا ساپار حالقىمنىڭ ەڭبەگى، مەن تەك سونى جۇزەگە اسىرعان اداممىن»، - دەدى ا. ايىمبەتوۆ.
