ءماجىلىس دەپۋتاتتارى بۇقارالىق شارالار وتكىزەتىن ورىندارعا الكوگول ونىمدەرىن اكەلۋگە تىيىم سالۋدى ۇسىندى
بۇل تۋرالى بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سپورتتىق- بۇقارالىق، مادەني ويىن- ساۋىق جانە باسقا دا ءىس- شارالار وتكىزۋ كەزىندە قاۋىپسىزدىكتى قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا تالقىلاۋ بارىسىندا ءمالىم بولدى.
ەسكە سالايىق، قۇجات سپورتتىق- بۇقارالىق، مادەني ويىن- ساۋىق جانە باسقا دا ءىس- شارالارىن ۇيىمداستىرۋعا، وتكىزۋگە بايلانىستى قۇقىقتىق قاتىناستاردى رەتتەۋگە باعىتتالادى. بۇل رەتتە شارالاردى وتكىزۋ ءۇشىن جەرگىلىكتى اتقارۋشى ورگاندار ۇيىمداستىرۋ كوميتەتتەرىن قۇراتىن بولادى. ولار شارالاردى وتكىزۋگە تارتىلعان ۇيىمداردىڭ قىزمەتىن ۇيلەستىرەدى. جەكە تۇلعالاردىڭ مادەنيەت، دەنە شىنىقتىرۋ، سپورت سالاسىنداعى قۇقىقتارى مەن مىندەتتەرى ايقىندالىپ، ولاردىڭ شارالارعا بارۋى كەزىندەگى تىيىم سالۋلارى مەن شەكتەۋلەرى كەڭەيتىلەدى. وسىعان بايلانىستى جەكە تۇلعالارعا اتالعان شارالارداعى مىنەز- قۇلىقتىڭ قاعيدالارىن بۇزعانى ءۇشىن اكىمشىلىك جاۋاپتىلىق ەنگىزىلەدى.
«قۇجاتتى ەكىنشى وقىلىمعا ازىرلەۋ بارىسىندا دەپۋتاتتار تاراپىنان ءبىرقاتار ۇسىنىستار ءتۇستى. اتاپ ايتقاندا، بۇقارالىق شارالار وتكىزەتىن ورىندارعا الكوگول ونىمدەرىن، سونىمەن بىرگە، مەتالل جانە شىنى قۇتىداعى ونىمدەردى اكەلۋگە تىيىم سالۋ ۇسىنىلدى»، - دەدى دەپۋتات مۇحتار تىنىكەيەۆ. ونىڭ ايتۋىنشا، دەپۋتاتتار تاراپىنان سسەنالار مەن ارەنالارعا ادام ءومىرى مەن دەنساۋلىعىنا قاۋىپ توندىرەتىن كەز كەلگەن زاتتى لاقتىرۋعا زاڭمەن تىيىم سالۋ ۇسىنىلعان. بۇل رەتتە حالىق قالاۋلىلارى «بۇقارالىق نەمەسە سپورتتىق- تاماشالاۋ شارالارى وتكىزۋگە ارنالعان ورىن» دەگەن ۇعىمعا يپپودرومدار مەن سيركتەردى دە جاتقىزىپ وتىر.
ءماجىلىس ماقۇلداعان زاڭ جوباسى سەناتقا جولدانادى.
اۆتور: قانات مامەتقازى ۇلى
