قانات يسلام: جاڭا مەنەدجەرمەن كەلىسىم-شارتقا وتىردىم، ەندى بارلىعى باسقاشا بولادى
- قانات اعا، جيىرماسىنشى جەڭىسىڭىز قۇتتى بولسىن! قازاقتىڭ ابىرويىن اسقاقتاتىپ، بەدەلىن تاعى ءبىر كوتەردىڭىز. شىن قۋاندىق. قارسىلاسىڭىزدى العاشقى راۋندتا-اق قۇلاتتىڭىز. ەڭ وڭاي جەكپە-جەگىڭىز وسى بولعان شىعار؟
- مەن بۇل جارىسقا وتە كوپ دايىندالدىم. نەگىزى بۇل جەكپە-جەك ءسال ەرتەرەك ءوتۋ كەرەك ەدى. ءتۇرلى سەبەپتەرمەن كەيىنگە شەگەرىلە بەردى. شامامەن 6 اي بويى وسى جارىستى كۇتتىم. سپورت ول قيىندىقتاردان تۇرادى. بيىك بەلەس باعىندىرىپ، قازاقتىڭ اتىن شىعارۋ ءۇشىن مەن سونىڭ بارلىعىنان ءوتۋىم كەرەك.
سابىر ساقتاپ، شىدامدىلىق تانىتىپ، كۇندەلىكتى جاتتىعۋىمدى ۇزبەدىم. ءتىپتى ادەتتەگىدەن دە كوبىرەك جاتتىعىپ، تەحنيكالىق مۇمكىندىكتەرىمدى ارتتىرۋعا كۇش سالدىم. ەشبىر قارسىلاسقا اناۋ ءالسىز، مىناۋ مىقتى دەپ قارامايمىن. ءار قارسىلاسقا تياناقتى دايىندالامىن. بۇل جولى 10 راۋندتىق كەزدەسۋ بولادى دەپ، دايىندالىپ شىققان ەدىم. قۇداي بۇيىرتىپ العاشقى راۋندتا-اق ۇتتىم. بۇل جەڭىسىم دە جاتتىعۋىمنىڭ ناتيجەسى دەپ ويلايمىن.
- ينتەرنەتتەن جاڭا كيىم ۇلگىسىن كيىپ، فوتوسەسسيا جاساعان سۋرەتىڭىزدى كورىپ قالدىق. جاڭا كەلىسىم-شارتتار جاسالدى ما؟
- «نەلسون» پروموۋتەرلىك كومپانياسىمەن ارى قاراي جۇمىس جاساسا بەرەمىن. ءبىراق، ءبىز قازىر جاڭا مەنەدجەرمەن كەلىسىم-شارتقا وتىردىق. ەندى مەنىڭ جەكپە-جەكتەرىمدى الەمدەگى ەڭ تانىمال مەنەدجەر ەل حەيمون ۇيىمداستىراتىن بولادى. ول - بۇرىن مەيۆەزەردىڭ كەزدەسۋلەرىن وتكىزگەن تاجىريبەلى مامان. الداعى ۋاقىتتا جاعىمدى جاڭالىقتار كوپ بولادى دەپ سەنەمىن. وسى رەتتە باۋىرجان وسپانوۆ اعاما ەرەكشە العىس ايتقىم كەلەدى. ول كىسىنىڭ مەنىڭ بيىك بەلەس باعىندىرۋىما جاساپ جاتقان ەڭبەگى وراسان زور. ۇلتتىڭ مۇددەسىن ويلايتىن، ەلگە تىرەك بولاتىن اعامنىڭ بارىنا قۋانامىن. بويىندا ازاماتتىق، دانالىق پەن پارساتتىلىعى مول اعا امان بولسىن!
- الەۋمەتتىك جەلىلەر مەن سايتتاردا «قانات يسلامنىڭ جەكپە-جەگىن وتاندىق تەلەارنالار نەگە كورسەتپەيدى؟» دەگەن ماقالالار جازىلىپ، ءتۇرلى پىكىرلەر ايتىلۋدا. شىنىمەن دە، نەگە جەكپە-جەكتەرىڭىزدى تەلەارنالاردان كورە الماي ءجۇرمىز؟ مۇنىڭ ءبىز بىلمەيتىن ءبىر سىرى بار ما؟
- سپورتتىڭ دا باسقا سالالار سياقتى ءوزىنىڭ زاڭدىلىعى بار. مۇنى ءبىرى تۇسىنسە، ءبىرى تۇسىنبەي جاتادى. كوپ ادام مەنى گەنامەن سالىستىرادى. گەنانىڭ ءوزى كوپ ەڭبەك ەتتى، ول دا باسىندا تەلەارنالارعا شىققان جوق. بەلگىلى ءبىر بەلەس باعىندىرعان سوڭ بارىپ، ەكرانداردان كورسەتىلە باستادى.
الەمگە تانىمال بولماي جاتىپ، تەلەارناعا شىعامىن دەۋ ول قيسىنعا كەلمەيدى. ەكراننان كورسەتۋ ءۇشىن سپورتشىنىڭ اتاق-دارەجەسى، جەتىستىگى بولۋ كەرەك. مەن 20 جەكپە-جەگىمدى ەندى عانا وتكىزدىم. امەريكانىڭ ءوزى بۇل كەزدەسۋىمدى ەكراننان كورسەتكەن جوق. ماعان ءالى كوپ ەڭبەك ەتۋ كەرەك. قازاقستانداعى تەلەارنالارعا مەنىڭ ەشقانداي دا وكپەم جوق.
«قازاقستان» ۇلتتىق ارناسى ءبىر باعدارلاماسىن ماعان ارناعانىن بىلەمىن، جارىستان سوڭ سكايپ ارقىلى سۇحباتتاستىق. قانشاما جۋرناليستەر جارىس الدىندا دا، جارىستان سوڭ دا حابارلاسىپ جاتتى. اللاعا شۇكىر، ەلىمنىڭ بارىنا، مەنى ىزدەيتىن قازاعىمنىڭ بارىنا قۋانىشتىمىن.
«قازاقستان» تەلەارناسى مەن «قازسپورتقا» العىستان باسقا ايتارىم جوق. ەشكىم مەنى شەتتەتىپ جاتقان جوق. مەن سپورتتا اقىرىن-اقىرىن ءوسىپ كەلە جاتىرمىن. بۇيىرتسا، جەكپە-جەگىمدى تەلەارنادان كورسەتەتىن كۇنگە دە جەتەمىز. سىزدەر سابىر ەتىپ كۇتۋلەرىڭىز كەرەك. ال ماعان تالماي ەڭبەك ەتۋ كەرەك.
- جيىرماسىنشى جەكپە-جەكتىڭ ۆيدەوسىن كورەرمەن ەكى كۇننەن سوڭ كوردى. سۋرەتتەر ءالى كۇنگە دەيىن جوق. نەگە؟ الدە قاسىڭىزدا جارناماڭىزبەن اينالىساتىن ادام جوق پا؟
- سىزدەردى تۇسىنەمىن. ەكراننان كورە الماعان سوڭ، كەزدەسۋلەرىمدى ينتەرنەتتەن كورۋگە اسىعاسىزدار. كەيدە وعان دا مۇمكىندىك بولماي جاتادى. جاڭا كەلىسىم-شارتقا ەندى قول قويدىق. بۇيىرتسا، ەندى بارلىعى باسقاشا بولادى دەپ ويلايمىن. كەلەسى جارىستارىمنىڭ سۋرەتى مەن ۆيدەولارى ءوز ۋاقىتىندا جاريالاناتىن شىعار.
- كەلەسى جەكپە-جەگىڭىز قاشانعا جوسپارلانۋدا؟ جىل سوڭىنا دەيىن قانشا جەكپە-جەك وتكىزەسىز؟
- قازىر وسى ماسەلەلەردى شەشىپ جاتىرمىز. الداعى 10 كۇننىڭ ىشىندە بەلگىلى بولادى. تاعى ءبىر كەزدەسۋ وتكىزۋىم مۇمكىن. قانات دەپ تاقىمىن قىسىپ وتىرعان ەلىمە العىس ايتقىم كەلەدى. قازاقتىڭ تۋىن كوتەرەتىن جاستار كوپ بولسىن. قازاق ەلى وركەندەپ دامي بەرسىن. ەلىمىز، ەلباسىمىز امان بولسىن!
- راحمەت، اعا. امان ءجۇرىڭىز! قازاقتىڭ قاناتىن الەم تانىسىن!
