بيلىكتىڭ قۇنى جوق- اقساق تەمىر
نۇر-سۇلتان. قازاقپارات. ەرتەدە اقساق تەمىر تۇرىك ءامىرشىسى بايازيتتى جەڭىپ، ونى تۇتقىنعا الىپتى دەيدى. سول بايازيتتى اقساق تەمىردىڭ الدىن الىپ كەلسە، ونىڭ دەنەسى ءبىر جاعىنا قاراي قيسايىپ كەتكەن قيسىق ەكەن.
اقساق تەمىر قارقىلداپ، ىشەگى قاتقانشا كۇلەدى دەيدى. سوندا بايازيت تۇرىپ:
- ەي، تەمىر، جاقسىلىق تا، جاماندىق تا ءبىر قۇدايدىڭ قولىندا. بۇگىنگى مەنىڭ باسىما تۇسكەن ءىس ەرتەڭ سەنىڭ باسىڭا كەلمەسىنە كىم كەپىل؟! - دەپتى.
- مەن تاعدىردىڭ تۇراقسىزدىعىن سەن ايتپاي- اق بىلەمىن. باق پەن داڭق جالعىز جاراتۋشىدان! سەنىڭ قاسىرەتىڭە كۇلىپ تۇرعانىم جوق، سەنى كورىپ ماعان مىنانداي ءبىر وي كەلدى، - دەيدى اقساق تەمىر. - ەگەر اللا تاعالا سەن جانە مەن سياقتى اقساق پەن قيسىققا تاق پەن ءتاج سىيلاعان بولسا، وندا قۇداي ءۇشىن بيلىكتىڭ دە ەشقانداي قۇنى بولماعانى- اۋ وسى!
