ا ق ش كونگرەسى ۋكرايناعا اسكەري كومەك بەرۋدى ماقۇلدادى
قۇجاتتا بۇعان قوسا اق ۇيگە ەگەر ماسكەۋ قارۋلانۋ تۋرالى كەلىسىمدەردىڭ ءبىرىن بۇزدى تاپسا، وندا جاۋاپ شارالارىن قولدانۋدى مىندەتتەيدى. پرەزيدەنت باراك وبامانىڭ وكىلدەرى ونىڭ بيۋدجەت جوباسىنا قول قويۋى ىقتيمال ەكەنىن حابارلادى.
وباما بۇعان دەيىنگى بيۋدجەت جوباسىنا كۋبانىڭ گۋانتانامو اسكەري بازاسىندا قاماۋدا وتىرعان قالعان سوتتالۋشىلاردى ا ق ش تۇرمەلەرىنە اۋىستىرۋعا تىيىم سالعاندىقتان ۆەتو قويعان ەدى. بيۋدجەت جوباسىندا ۋكرايناعا سەپاراتيستەرمەن كۇرەسكە 300 ميلليون دوللار ءبولۋ قاراستىرىلعان. 50 ميلليون دوللار قارۋ- جاراق، ونىڭ ىشىندە قۇرىش بۇزاتىن جۇيە، گراناتومەتتەر، مينومەتتەر مەن كاليبرى كىشى قارۋ- جاراق جانە وق- ءدارى الۋعا جۇمسالۋى مۇمكىن. بۇعان دەيىن وباما اكىمشىلىگى «رەسەيدى ارانداتۋى مۇمكىن» دەگەن قاۋىپپەن ۋكراينانى قارۋلاندىرۋعا شاقىرعان ۇندەۋلەردى ەلەمەي كەلگەن.
بيۋدجەت جوباسى بويىنشا، اق ءۇي بەلگىلى ءبىر مەرزىمگە دەيىن كونگرەسسكە رەسەيدىڭ 1980 - جىلداردىڭ سوڭىندا قول قويعان ورتا جانە قىسقا قاشىقتىققا ۇشاتىن زىمىرانداردى جويۋ تۋرالى كەلىسىمدى بۇزباعانى تۋرالى ەسەپ بەرىپ وتىرۋى ءتيىس.
ماۋسىم ايىندا جاريالاعان ەسەبىندە مەملەكەتتىك دەپارتامەنت رەسەي بيلىگى كەلىسىمدى بۇزاتىن زىمىران جۇيەسىن قولداندى دەپ حابارلاعان. ماسكەۋ مۇنى جوققا شىعارىپ، ەسەسىنە ۆاشينگتوندى تىيىم سالىنعان قارۋ- جاراق جۇيەسىن قولداندى دەپ ايىپتاعان.
«ازاتتىق»
