نازاربايەۆتىڭ ورتانشى قىزىنىڭ ءرولىن سومدايتىن اكتريسانىڭ ەسىمى بەلگىلى بولدى

استانا. قازاقپارات - تى. «جۇلدىزدار وسىلاي جانعان ەدى» فيلمىنىڭ ەكىنشى رەجيسسەرى ۆيكتوريا نيكولەنكو تانىمال اكتريسا بيبىگۇل اقتان دينارا قۇلىبايەۆانىڭ ءرولىن نەلىكتەن سومدامايتىنىن ايتتى.

بۇل تۋرالى Today.kz-كە سىلتەمە جاساپ NUR. KZ حابارلايدى.

«بيبىگۇل ءسۇيىنشالينانىڭ (اقتان) ورنىنا دينارا باقتىبايەۆا تۇسەتىن بولادى. بۇگىن ونىڭ ءتۇسىرىلىم الاڭىنداعى العاشقى كۇنى. «قازاق فيلم» كينوستۋدياسىنىڭ پاۆيلونىندا پرەزيدەنت پاتەرىنىڭ مۇقاباسى جاسالدى. بارلىق وتباسىن ءتۇسىرىپ جاتىرمىز: نۇرسۇلتاندى، سارانى، قىزدارىن. باستاپقىدا دينارا نازاربايەۆانىڭ رولىنە سىناما جاريالاندى. بيبىگۇل ءسۇيىنشالينانىڭ ءرول سومدايتىنى ماقۇلداندى. الايدا ءبىز ونىمەن قالاي جۇمىس جاساۋ كەرەكتىگىن بىلمەدىك. ول بۇل جاعداي تۋرالى تولىق شىندىقتى ايتتى. تۇسىرىلىمگە دەيىن تۇسىنبەستىكتەر ورىن العاندىقتان ول ءبىزدىڭ فيلمگە ءتۇسىپ ۇلگەرمەدى. ول سىنامادان وتپەدى»، - دەيدى ۆيكتوريا نيكولەنكو.

بيبىگۇل اقتان بولسا، سەرگەي سنەجكيننىڭ اشۋشاڭ ايەلىنە ۇناماي قالعانى ءۇشىن رولدەن الاستاتىلعانىنا سەنىمدى.

«مەنى رەجيسسەر سەرگەي سنەجكيننىڭ اشۋشاڭ ايەلىنە ۇناماي قالعانىم ءۇشىن تۇسىرىلىمنەن شىعارىپ تاستادى. وكىنىشتى، مەن نۇرسۇلتان ءابىش ۇلىن قاتتى قۇرمەتتەيمىن. ونىڭ ومىرىنە ارنالعان جوبادا ونەر كورسەتكىم-اق كەلدى. ءبىراق، قورقاتىن تۇگى جوق، ماسكەۋگە كەتەم، وندا دا ءتۇرلى جوبالار بار. دينارا نازاربايەۆانىڭ ءرولىن ەندى كىم سومدايدى ەكەن؟ مەنىڭ بىلۋىمشە، نازاربايەۆ بارلىق اكتەردى ءوزى تاڭداعان، ءبىراق، رەجيسسەر سنەجكين مەن ايەلى ينەسسانىڭ پىكىرى ماڭىزدىراق سەكىلدى»، - دەيدى اكتريسا.

پرەزيدەنت جايلى فيلمنىڭ جالعاسى وسى جىلى جازدا باستالعان بولاتىن، ول ەكرانعا تەك 2016-جىلى جول تارتپاق. كينودا نۇرسۇلتان نازاربايەۆتىڭ ءرولىن اكتەر بەرىك ايتجانوۆ وينايدى، ال بۇرىنعى تۇسىرىلىمدەردە بۇل ءرولدى نۇرلان ءالىمجانوۆ سومداعان ەدى.

ەسكە سالا كەتەيىك، جاقىندا عانا اتالمىش كينو كارتينادا تانىمال اكتريسا قارلىعاش مۇحامەدجانوۆا داريعا نازاربايەۆانىڭ كەيىپكەرى اتانعانىن حابارلاعان بولاتىنبىز.