توقتار اۋباكىروۆ: تالعات بيگەلدينوۆ قازاق حالقىنىڭ مارتەبەسىن ارتتىرعان اسىل تۇلعا
بۇل تۋرالى بۇگىن الماتىدا تالعات بيگەلدينوۆ تۇرعان ۇيگە ەسكەرتكىش تاقتا ورناتۋ ءراسىمى بارىسىندا قازاقتىڭ تۇڭعىش عارىشكەرى، كەڭەس وداعىنىڭ باتىرى، قازاقستان رەسپۋبليكاسىنىڭ حالىق قاھارمانى، داڭقتى ۇشقىش توقتار اۋباكىروۆ مالىمدەدى.
«تالعات اعا، كوڭىلى تازا، جانى جايساڭ جان بولاتىن. ونىڭ ءومىرى، جاساعان ەرلىكتەرى ءبىز ءۇشىن ۇلگى. سوعىستان كەيىنگى ۇرپاق - ءبىزدى ءوزىنىڭ ونەگەلى ومىرىمەن تاربيەلەگەن، كوككە كوتەرگەن، ۇشقىش ەتكەن، وتاندى ءسۇيۋدى ۇيرەتكەن وسى تالعات اعا بولاتىن. ول نەبارى 23 جاسىندا ەكى مارتە كەڭەس وداعىنىڭ باتىرى اتانىپ، قازاق حالقىن، قازاقستاندى بۇكىل الەمگە تانىتقان، مارتەبەسىن ارتتىرعان جاسامپاز تۇلعا. بۇل مەموريالدى تاقتا ەندى وعان كەرەك ەمەس. ول تىرىلەرگە كەرەك، قازاقستاننىڭ بولاشاعىن جاساۋشى وسكەلەڭ ۇرپاققا كەرەك. ونىڭ كورىپ: «مەن دە تالعات بيگەلدينوۆتەي باتىر بولعىم كەلەدى، مەن دە ۇشقىش بولىپ، وتان قورعاعىم كەلەدى»، - دەپ الدىنا ماقسات قوياتىن جاستار شىعىپ جاتسا، مەن بۇعان ەرەكشە قۋانامىن. ءبىز وسىنداي وتانداسىمىز بولعانى ءۇشىن باقىتتى حالىقپىز»، - دەدى ت. اۋباكىروۆ.
ايتا كەتەلىك، سالتاناتتى راسىمگە الماتى قالاسىنىڭ اكىمى باۋىرجان بايبەك، تالعات بيگەلدينوۆتىڭ جارى ورىندىبيكە جەكەن قىزى مەن قىزدارى، ۇلى وتان سوعىسىنىڭ ارداگەرلەرى، مەملەكەت جانە قوعام قايراتكەرلەرى، ق ر قارۋلى كۇشتەرىنىڭ ارداگەرلەرى جانە قالا تۇرعىندارى قاتىستى.
اۆتور: جاپپاربەرگەن ايبوتا
