ەكىباستۇزدا كوندۋكتور ايەل حالىقتىڭ سۇيىكتىسىنە اينالدى
الماگۇل نۇرعاليەۆا 10 جىلدان اسا ۋاقىت بويى كوندۋكتور بولىپ جۇمىس ىستەيدى. وسى ۋاقىتتىڭ ىشىندە ول جولاۋشىلاردان كوپتەگەن جىلى ءسوز ەستىدى. ولاردىڭ كەيبىرى حات جازىپ، ول جۇمىس ىستەيتىن "نار ترانس" ج ش س- عا اپارعان. الايدا ونى قادىر تۇتقان جانداردىڭ سانى ەكىباستۇزدا جانە وزگە قالالاردا مىڭداپ سانالادى، ءبىراق ءوزى بۇل جايتتان بەيحابار ەدى. بۇل وقيعا الماگۇلدىڭ جەرلەسى تاتيانا رومانەسكۇل "ودنوكلاسسنيكي" الەۋمەتتىك جەلىسىنە كوندۋكتور ايەلمەن تۇسكەن سۋرەتىن سالعاننان كەيىن باستالعان.
سۋرەت جاريالانعان ءبىرىنشى تاۋلىكتەردە وعان 4 مىڭنان اسا ادام لايك باسقان. 200 دەن اسا قولدانۋشى سۋرەتكە پىكىر قالدىرىپ، الماگۇل نۇرعاليەۆانىڭ جۇمىسىنا قاتىستى ويلارىن جازدى. ولاردىڭ قاتارىندا ەكىباستۇزدىقتار عانا ەمەس، پاۆلودار، قاراعاندى، استانا، بريانسك جانە ياكۋتيا تۇرعىندارى دا بولدى. «ونىڭ ورنى قازاقستان پارلامەنتىندە»، - دەپ جازدى قولدانۋشىلاردىڭ ءبىرى ۆيكتور حلىستوۆ. تاعى ءبىر قولدانۋشى الماگۇل نۇرعاليەۆانىڭ ونىڭ جوعالتقان انىقتاماسىن تاۋىپ الىپ، وعان قايتارعانىن جازدى.
الماگۇل نۇرعاليەۆا Tengrinews.kz تىلشىسىنە بۇعان دەيىن №9 -بالاباقشادا تاربيەشى بولىپ جۇمىس ىستەگەنىن ايتتى، ءبىراق قايتا قۇرۋ كەزەڭىندە تابىسى جوعارى جۇمىس ىزدەپ، بازاردا ساتۋشى بولعان. ول جالعىز قىزىن اياقتاندىرۋعا تىرىسىپتى. كەيىن ونىڭ قۇربىسى رەيستە ورنىنا جۇمىس ىستەپ بەرۋىن وتىنگەن. ول ءسويتىپ، اۆتوبۋستا كوندۋكتور بولىپ جۇمىس ىستەپ قالىپتى.
ءاردايىم سەرگەك ءجۇرىپ، جولاۋشىلارعا جاقسى كوڭىل كۇي سىيلاۋ قولىڭىزدان قالاي كەلەدى دەگەن سۇراققا ول: «جۇمىسىمدى جاقسى كورەمىن! جولاۋشىلاردى جاقسى كورەمىن! اۆتوبۋس جىلى. جۇرگىزۋشى دە جاقسى. سالون ءاردايىم تازا. اشۋلاناتىن نەسى بار؟ ادامدار جۇمىسقا، ۇيىنە بارادى، ىستەرىمەن جۇرەدى. جاقسى كوڭىل كۇي ەشقاشان ارتىق بولمايدى. ماستاردى، جانجالقويلاردى ۇناتپايتىنىم راس. مەن ولاردى جاياۋ سەرۋەندەۋگە جىبەرەمىن. تازا اۋادا ءوز ارەكەتىنە ويلانۋعا كەڭەس بەرەمىن. وزگە جولاۋشىلار نەلىكتەن اراقتىڭ ءيىسىن يىسكەپ، ولاردىڭ بىلاپىت سوزدەرىن تىڭداۋى ءتيىس؟»، - دەپ جاۋاپ بەردى.
ايەل ءوزىنىڭ تانىمالدىعى تۋرالى كاسىپورىن كۇزەتشىلەرىنەن بىلگەن، كەيىن ازاماتتاردان ەستىپتى. جاريالانىمنان كەيىنگى كەلەسى كۇنى تاڭەرتەڭ جولاۋشىلار وعان كۇلىمدەپ قاراي باستاعان. «باسىندا ولار نەگە كۇلەدى دەپ ەشتەڭە تۇسىنە المادىم، - دەيدى الماگۇل، - كەيىن ولار مەنى ينتەرنەتتەن كورگەندەرىن، جۇلدىز بولىپ كەتكەنىمدى ايتتى! (كۇلدى). مەن تۋرالى جازىپ جاتسا، دەمەك ەڭبەگىم بار شىعار! مەن ءۇشىن وتە عانيبەت!»، - دەدى ول.
جولاۋشىلاردىڭ ايتۋىنشا، ونىمەن وتكىزگەن ساپاردان كەيىن كۇنى بويى كوڭىل كۇيلەرى كوتەرىڭكى جۇرەدى. الەۋمەتتىك جەلىدە ەكىباستۇزعا كەلىپ، الماگۇل نۇرعاليەۆامەن بىرگە جەتىنشى اۆتوبۋسپەن جۇرگىسى كەلەتىندەردىڭ سانى ارتىپ جاتىر. ال ونى نومەرى 335 جەتىنشى اۆتوبۋستا كەزدەستىرۋگە بولادى.
