قازاق باتىرىنىڭ ءمۇسىنى ماسكەۋدەگى ورتالىق مەملەكەتتىك مۋزەيگە قويىلادى - فوتو
بۇل تۋرالى بۇگىن الماتىدا تالعات بيگەلدينوۆ تۇرعان ۇيگە ەسكەرتكىش تاقتا ورناتۋ ءراسىمى بارىسىندا «گەنەرالدار كەڭەسى» رەسپۋبليكالىق قوعامدىق بىرلەستىگى ءتورالقاسىنىڭ ءتوراعاسى، ادىلەت گەنەرال-مايورى رۇستەم قايداروۆ ءمالىم ەتتى.
«ءمۇسىن دايىن بولدى. ەندى قۇداي قالاسا، وسى قاراشا ايىنىڭ 20 -جۇلدىزىندا ماسكەۋگە ونى الىپ بارامىز. ءسويتىپ، 9 -جەلتوقساندا مۋزەيدىڭ داڭق زالىنا تالعات بيگەلدينوۆتىڭ ءمۇسىنى سالتاناتتى جاعدايدا قويىلاتىن بولادى. ال 2016 -جىلى كەڭەس وداعىنىڭ باتىرى، ق ر تۇڭعىش قورعانىس ءمينيسترى، ارميا گەنەرالى ساعادات نۇرماعامبەتوۆتىڭ ءمۇسىنى قويىلادى. ءبىز «گەنەرالدار كەڭەسى» تالعات بيگەلدينوۆتىڭ رۋحى الدىندا باسىمىزدى يەمىز. ونىڭ ەسىمى جۇرەگىمىزدە ماڭگى ساقتالادى»، - دەدى ر. قايداروۆ.
ايتا كەتەلىك، سالتاناتتى راسىمگە الماتى قالاسىنىڭ اكىمى باۋىرجان بايبەك، تالعات بيگەلدينوۆتىڭ جارى ورىندىبيكە جەكەن قىزى مەن قىزدارى، قازاقستاننىڭ تۇڭعىش عارىشكەرى توقتار اۋباكىروۆ، ۇلى وتان سوعىسىنىڭ ارداگەرلەرى، مەملەكەت جانە قوعام قايراتكەرلەرى، ق ر قارۋلى كۇشتەرىنىڭ ارداگەرلەرى جانە قالا تۇرعىندارى قاتىستى.
اۆتور: جاپپاربەرگەن ايبوتا
