ەلوردانىڭ جەدەل جاردەم قىزمەتى جەتىلدىرىلىپ، تۇندە قىزمەت ىستەيتىن اق حالاتتىلاردىڭ بالالارى بالاباقشامەن قامتىلماق
بۇل تۋرالى قالالىق اكىمدىكتە وتكەن اپپارات كەڭەسىندە ادىلبەك جاقسىبەكوۆ مالىمدەدى، دەپ جازادى استانا قالاسى اكىمدىگىنىڭ رەسمي سايتى.
«ءبىزدىڭ بارلىعىمىز مەديتسينالىق جەدەل جاردەم قىزمەتى جۇمىسىنىڭ دۇرىس ۇيىمداستىرىلماعانى سەبەپتى زارداپ شەگىپ كەلەمىز نەمەسە زارداپ شەگۋىمىز مۇمكىن. ءدال قازىر بۇعان باسقاشا قىرىنان قاراۋ كەرەك»، - دەي كەلە، ەلوردا باسشىسى اتالعان جۇمىسقا قاتىسى بار بارلىق باسقارمانى جۇمىلۋعا شاقىردى.
كەشەندى جوسپار جاڭا جەدەل مەديتسينالىق كومەك قىزمەتىن جاڭاشا كەيىپتە كورسەتەدى جانە ول قازاقستان استاناسىنىڭ جوعارى ستاندارتتارىنا ساي بولماق.
سونداي- اق جوسپاردا ينفراقۇرىلىم، تەحنيكالىق جابدىقتاۋ، كولىكپەن قامتاماسىز ەتۋ، كادرلىق قۇرىلىم جانە وسى قىزمەتتەگى مامانداردىڭ تۇرعىن ۇيمەن قامتىلۋى ماسەلەلەرى قاراستىرىلادى. بۇدان وزگە، ەڭ باستى نازار شۇعىل تۇردە وقيعا ورنىنا جونەلتىلگەن كولىك قوزعالىسىن جانە اۋلاىشىلىك الاڭدارعا كىرەتىن جولدارداعى قوزعالىس جۇيەسى جەڭىلدەتۋگە باعىتتالعان. سونىمەن قاتار جەدەل جاردەم قىزمەتىندە تۇنگى ۋاقىتتا جۇمىس ىستەيتىن قىزمەتكەرلەردىڭ بالالارىنا ارنالعان بالاباقشا ۇيىمدارىنىڭ ماسەلەسى شەشىمىن تاپپاق.
اپپارات كەڭەسىندە تەمىرجول ۆوكزالى جۇمىسى ءسوز بولدى. جاڭا تەمىرجول ۆوكزالىنىڭ قۇرىلىسىنا بايلانىستى ەسكى ۆوكزال دا كوزدەن تاسا قالماۋ كەرەكتىگى ايتىلدى. ءا. جاقسىبەكوۆ ءوز سوزىندە ۆوكزالدىڭ جاعدايى استانانىڭ دەڭگەيىمەن سايكەس بولۋى شارت، سونىمەن بىرگە قىزمەت ساپاسى مەن ۆوكزال ماڭىنداعى اقىلى كولىك تۇراعىنا دا نازار اۋدارۋ كەرەك ەكەندىگىن اتاپ ءوتتى.
اپتا سايىن اكىمدىكتە وتەتىن اپپارات كەڭەسىندە ازاماتتاردىڭ وتىنىشتەرى بويىنشا ماسەلەلەر قارالادى. سونىڭ ءبىرى قالاداعى ينتەرنەت ساپاسىنا سوڭعى ۋاقىتتا شاعىمدار ءجيى ايتىلۋدا. سيگنال مەن جىلدامدىقتىڭ ناشارلاۋى، ءۇزىلۋى تۇرعىنداردىڭ نارازىلىعىن تۋدىرۋدا. ءبىر اپتانىڭ ىشىندە «استاناتەلەكوم» ۇسىنىپ وتىرعان قىزمەتكە تالداۋ جاسالىپ، كەلەسى اپپارات كەڭەسىندە قارالاتىن بولدى.
