قىتايلىق ۇلى رەفورماتور تۋرالى كىتاپ قازاق تىلىندە جارىق كوردى
بۇل كىتاپ قىتايدىڭ ۇلى رەفورماتورى تۋرالى جازىلعان قازاق تىلىندەگى العاشقى ەڭبەك.
الەم تاريحىنداعى ۇلى تۇلعالار تۋرالى ەڭبەكتەر قازاق تىلىندە مۇلدەم از. تەك «مادەني مۇرا» باعدارلاماسى اياسىندا عانا ءبىرقاتار ويشىلداردىڭ ەڭبەكتەرى اۋدارىلعان انا تىلىمىزگە. ال، الەمگە تانىمال قايراتكەرلەر، ساياساتشىلار، رەفورماتورلار تۋرالى قازاق تىلىندە سەريالى كىتاپتار ەشقاشان شىقپاعان. وسى ولقىلىقتىڭ ورىنىن تولتىرماق نيەتپەن بەلگىلى جازۋشى ديداحمەت ءاشىمحان ۇلى يگىلىكتى ءىستى باستاعان بولاتىن.
جازۋشى كوزى تىرىسىندە «ۇلى رەفورماتور - دەن سياوپين» اتتى كىتاپتى شىعارۋ ءۇشىن قىتايداعى «ۇلتتار» باسپاسىنىڭ باسشىسى يۋ بيشين مىرزامەن كەلىسىم جاساعان ەدى. وسىلايشا نەگىزگى شارۋانى ءوزى اتقارىپ كەتكەن بولاتىن. سونىڭ ناتيجەسىندە دەن سياوپين(دىڭ شياۋپيڭ - رەد.) تۋرالى كىتاپ قازاق وقىرمانىنا جەتىپ وتىر.
كىتاپتىڭ جارىق كورۋىنە بەيجىڭدەگى «ۇلتتار» باسپاسى جانە قازاقستانداعى قىتاي ەلشىلىگى تىكەلەي قولعابىس جاسادى. ال، قاراشانىڭ 13 ىنە جوسپارلانعان تۇساۋكەسەرگە ساياساتكەرلەر، زيالى قاۋىم وكىلدەرى شاقىرىلىپ وتىر. سونىمەن بىرگە «ۇلتتار» باسپاسىنىڭ وكىلدەرى مەن قىتاي حالىق رەسپۋبليكاسىنىڭ قازاقستانداعى ەلشىلىگىنەن دە ارنايى قوناقتار قاتىسادى.
دەن سياوپين بۇگىنگى قىتاي ەلىنىڭ الەمدىك گەوساياساتتان ءوز ەلىنىڭ لايىقتى ورىن الۋىنا جانە ەكونوميكاسىنىڭ قارىشتاپ ورلەۋىنە ۇشان- تەڭىز ەڭبەك ءسىڭىردى. سونداي-اق، ول قىتاي ەلىن دامىعان مەملەكەتتەر قاتارىنا ەنگىزۋ ارقىلى قىتاي ۇلتىنىڭ ۇلتتىق كوسەمىنە ءھام الەمدىك تۇلعاعا اينالدى.
الەمدىك دەڭگەيدەگى رەفورماتوردى قازاق وقىرماندارى دا تانىپ ءبىلۋى قاجەت. سول ماقساتتا جارىق كورگەن بۇل جيناقتى قىتايدىڭ «ۇلتتار» باسپاسىنىڭ ماماندارى قازاق تىلىنە اۋدارىپ، كىتاپ بولىپ باسىلۋىنا ەرەكشە كومەك كورسەتتى. كىتاپ ساياساتتانۋشىلارعا، عالىمدارعا، تاريحشىلارعا، ستۋدەنتتەرگە جانە جالپى وقىرمان قاۋىمعا ارنالعان.
Kaznews.kaztrk.kz
