تاياۋ كۇندەرى قازاقستاننىڭ اۋا رايى توسىن مىنەز تانىتادى
سينوپتيكتەر 10-12- قاراشاعا ارنالعان اۋا رايى بولجامىن جاريالادى.
سينوپتيكتەردىڭ مالىمەتىنشە، سكانديناۆيادا قالىپتاسقان سيكلوندار بىرىنەن كەيىن ءبىرى ورال مەن باتىس ءسىبىر ارقىلى جىلجىپ بارادى. ول سيكلوندارمەن بايلانىستى فرونتتار قازاقستاننىڭ اۋا رايىنا اسەر ەتەدى.
«وسىعان بايلانىستى الداعى ءۇش تاۋلىكتە رەسپۋبليكانىڭ بارلىق اۋماعىندا الا بۇلتتى بولىپ، جاڭبىر قارعا ۇلاسادى. سونىمەن قاتار، كوكتايعاق بولىپ، كەي جەرلەردە جەلدىڭ جىلدامدىعى سەكۋندىنا 15-20 مەترگە دەيىن جەتەدى»، - دەپ حابارلادى سينوپتيكتەر.
مامانداردىڭ ايتۋىنا قاراعاندا، ەلىمىزدىڭ سولتۇستىگىندە بوران سوعىپ، اۋا تەمپەراتۋراسى تومەندەيدى. الايدا 12- قاراشاعا قاراي كۇننىڭ قايتا جىلىنۋى كۇتىلىپ وتىر.
ەسكە سالا كەتەيىك، بۇعان دەيىن سينوپتيكتەر قاراشا ايىندا اۋا رايىنىڭ قانداي بولاتىنىن ايتتى. بولجام بويىنشا، كۇزدىڭ سوڭعى ايى قاراشادا اۋا رايى جاۋىن-شاشىندى بولادى، جەل كۇشەيىپ، تۇمان ءتۇسىپ، كوكتايعاق كۇتىلەدى.
