قىزىلوردادا ايدىن ايىمبەتوۆتىڭ قۇرمەتىنە جاڭا تۋعان نارەستەگە عارىشكەردىڭ ەسىمى بەرىلدى - فوتو

  قىزىلوردا. قازاقپارات - عارىشكەر، حالىق قاھارمانى ايدىن ايىمبەتوۆ ەكى كۇندىك ساپارمەن  قىزىلورداعا كەلدى. عارىشكەر الدىمەن نازاربايەۆ زياتكەرلىك مەكتەبىندە بولىپ، وقۋشىلارمەن كەزدەستى.

 عارىشقا ساپارى تۋرالى اڭگىمەلەپ، بالالاردىڭ ساۋالىنا جاۋاپ بەردى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

- عارىشكەر بولۋ مەنىڭ بالا كۇنگى ارمانىم ەدى. وعان جەتۋ ءۇشىن جاستايىمنان سپورتپەن شۇعىلداندىم، كوپ وقۋعا تىرىستىم. عارىشقا بارىپ كەلۋىم مەنىڭ عانا ەمەس، ەڭ اۋەلى پرەزيدەنتىمىز نۇرسۇلتان ءابىش ۇلىنىڭ، «قازعارىشتىڭ»، بۇكىل قازاق ەلىنىڭ ەڭبەگى دەر ەدىم. عارىشتا ادام بالاسى ءۇشىن ءالى تىلسىم دۇنيەلەر كوپ. ونى يگەرۋ جاستاردىڭ ەنشىسىندە. سوندىقتان جاقسى ءبىلىم الىڭىزدار، - دەدى ايدىن ايىمبەتوۆ وقۋشىلارمەن كەزدەسۋدە.

مۇنان سوڭ عارىشكەر انا مەن بالا ورتالىعىندا بولدى. 200 ورىندىق پەريناتالدى ورتالىقتا كۇنىنە 35 نارەستە دۇنيە ەسىگىن اشادى. جاڭا تۋعان بۇلدىرشىندەردىڭ بىرىنە عارىشكەردىڭ ەسىمى قويىلدى. كىشكەنتاي ايدىن اتا- اناسىنىڭ بەسىنشى پەرزەنتى ەكەن.

- ءدال وسى كۇنى وڭىرگە عارىشكەر، حالىق قاھارمانى كەلىپ جاتقانى ءبىز ءۇشىن ۇلكەن قۋانىش. ۇلىم عارىشكەر بولسىن دەگەن نيەتپەن ايدىن ايىمبەتوۆكە بالامىزدىڭ ەسىمىن قويدىردىق. بۇل ءبىزدىڭ وتباسىمىز ءۇشىن تاريحي ءسات دەر ەدىم. كىشكەنتاي ايدىننىڭ بيىككە قارىشتاپ، قازاقتىڭ اتىنا ساي ۇل بولۋىن تىلەيمىن، - دەيدى گۇلىستان تاستىبايەۆا.

ايدىن ايىمبەتوۆ «اتامەكەن» بالالار اۋىلىنا دا ات باسىن بۇرىپ، بالالارمەن بىرگە اعاش وتىرعىزدى. مۇنان سوڭ ايدىن ايىمبەتوۆ سىر وڭىرىنە كەلگەندەگى ماقساتىن ايتىپ، جۋرناليستەرگە سۇحبات بەردى.

 - سىر ەلى مەن ءۇشىن وتە ىستىق. ويتكەنى مەن كوسموسقا اتتانعان «بايقوڭىر» عارىش ايلاعى وسى ايماقتا ورنالاسقان. سونداي- اق، مەنىڭ ومىرلىك جارىم دا  قىزىلوردا وبلىسىنىڭ تۋماسى. كوككە كوتەرىلگەندە وتباسىمنىڭ، حالىقتىڭ قولداۋىن سەزىندىم. عارىشتان جەردى كورگەندە، قازاقستاندى كورگەندەگى سەزىمىمدى ايتىپ جەتكىزۋ مۇمكىن ەمەس. مەن ەندى «قازعارىش» اگەنتتىگىندە جۇمىسىمدى جالعاستىراتىن بولامىن. مۇندا كەلگەندەگى نەگىزگى ماقساتىم - جاستارمەن كەزدەسۋ. ەلدىڭ بولاشاعى سولاردىڭ قولىندا. سوندىقتان ءبىز جاس ۇرپاقتىڭ ءبىلىمدى، پاتريوت بولىپ وسۋىنە كوپ كوڭىل ءبولۋىمىز كەرەك، - دەيدى حالىق قاھارمانى ا. ايىمبەتوۆ.

ەكى كۇندىك ساپارى اياسىندا عارىشكەر ايدىن ايىمبەتوۆ قىزىلوردا قالاسىندا وتەتىن ءداستۇرلى جاستار فورۋمىنا قاتىسادى.