ارالدا «سوڭعى پارىز» رومانىنىڭ كەيىپكەرلەرىنە ەسكەرتكىش ورناتىلدى - فوتو

قىزىلوردا. قازاقپارات - بۇگىن قىزىلوردا وبلىسى ارال اۋدانىندا حالىق جازۋشىسى ءابدىجامىل نۇرپەيىسوۆتىڭ «سوڭعى پارىز» رومانىنىڭ كەيىپكەرلەرىنە ارنالعان ەسكەرتكىش اشىلدى. شاراعا ءا. نۇرپەيىسوۆ وتباسىمەن بىرگە قاتىستى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

وتكەن جىلى ارالدا جازۋشىنىڭ توقسان جىلدىق مەرەيتويىنا وراي شىعارماشىلىق ءۇيى اشىلعان بولاتىن. وسكەلەڭ ۇرپاق ادەبيەت ۇيىنەن جازۋشىنىڭ شىعارماشىلىعىمەن، تانىمال تۇلعالارمەن تۇسكەن سۋرەتتەرىمەن تانىسا الادى. ەسكەرتكىش وسى شىعارماشىلىق ءۇيىنىڭ الدىنا ورناتىلدى.

- قازاقتىڭ ەكى عاسىر ءومىرىن كەرەمەت سۋرەتتەپ، روماندار جازدى. قالامىنىڭ قارىمىمەن قازاق ۇلتىن الەمگە ايگىلەدى. «سوڭعى پارىزدا» تارتىلعان تەڭىزبەن ادامداردىڭ مەيىرىمدىلىگىنىڭ ازايىپ بارا جاتقاندىعىن ۇلكەن شەبەرلىكپەن ۇشتاستىرعان. شىعارمانى وقي وتىرىپ، سول وقيعانىڭ بەل ورتاسىندا جۇرگەندەي بولاسىڭ. وسىنداي ابىز اعامىزدىڭ شىعارماشىلىق ءۇيى سوزبەن ويدىڭ پارقىن تۇسىنەتىن رۋحاني ورداسىنا اينالادى. دۇنيە تۇرعانشا تۇرىڭىز ابىز ابە اعا، - دەدى وبلىس اكىمى قىرىمبەك كوشەربايەۆ.

«بۇدان كەيىن تۋعان توپىراققا كەلۋدىڭ ءساتى تۇسە مە، بىلمەيمىن. ول ەندى اللانىڭ بۇيرىعىنا، دەنساۋلىعىما بايلانىستى. ءبىراق ءدال قازىر شەكسىز قۋانىشتىمىن»، - دەدى ءابدىجامىل نۇرپەيىسوۆ.

ايتا كەتەيىك، ەلىمىزدە تەك ءا. نۇرپەيىسوۆتىڭ شىعارمالارىنىڭ كەيىپكەرلەرىنە ەسكەرتكىش وراناتىلعان. 2008-جىلى اقتوبە وبلىسىندا «قان مەن تەر» رومانىنىڭ كەيىپكەرلەرىنە قويىلسا، ارالداعى ەسكەرتكىش ەكىنشىسى.