الماتى قالاسىنىڭ حايۋاناتتار باعى ءوزىنىڭ قۇرىلعان كۇنىن اتاپ ءوتتى - فوتو
تاڭەرتەڭنەن اۋا رايى جىلىنىپ، بۇلتتار سەيىلىپ، كۇنىڭ كوزى كورىنگەن سوڭ ءارى دەمالىس كۇنى بولعان سوڭ زووباققا ادامدار قالالىقتار مەن قالا قوناقتارى كوپ جينالدى. جالپى، جانۋارلاردى كورۋگە جانە ءار ءتۇرلى قىزىقتى بايقاۋلارعا قاتىسۋعا بەس مىڭنان استام ادام كەلدى.
«زووباقتىڭ وزىندىك تاريحى جانە اتاپ وتەر داستۇرلەرى بار. بۇگىنگى تاڭدا مۇندا 348 ءتۇرلى جانۋار توپتاستىرىلعان. ولاردىڭ جالپى سانى التى مىڭنان اسادى. ەگەر مۇنداعى جىلانداردى ءبىر ءجىپتىڭ بويىنا ءتىزىپ قويار بولسا، ۇزىندىعى شامامەن 1,5 شاقىرىم بولار ەدى. ەندى الداعى ۋاقىتتا قالامىزدىڭ حايۋاناتتار باعى تۋريستەردىڭ نازارىن اۋداراتىن كورىكتى ورىنداردىڭ بىرىنە اينالادى دەگەن ۇمىتتەمىز. وسى ماقساتتا كوپتەگەن جوبالاردى جۇزەگە اسىرىپ جاتىرمىز. سولاردىڭ ءبىرى - بۇگىنگى شارا»، - دەدى ءوز سوزىندە زووباقتىڭ رەسمي وكىلى ميحايل سوروكوۋموۆ.
بۇگىن مەرەكەلىك شارا اياسىندا بالالار سۋرەتتەرىنىڭ كورمەسى، بالالارعا ارنالعان ويىندار، فلەشموبتار ۇيىمداستىرىلدى. سونىمەن قاتار، «اڭدىق كيىمدەردىڭ شوۋى»، قۋىرشاق تەاترلارىنىڭ قويىلىمدارى، «ەمەن جاڭعاعىنىڭ كۇزى» اتتى بايقاۋ جانە باسقا دا شارالار وتكىزىلدى.
ايتا كەتەلىك، جوعارىداعى بايقاۋعا 1,5 تونناعا جۋىق ەمەن جاڭعاعى جينالدى.
