كاسىپكەر اتانعان كولىك جۇرگىزۋشى
جاس كەزىندە بەسقاراعاي اۆتوبازاسىندا كاماز ساموسۆالىنىڭ جۇرگىزۋشىسى بولىپ ەڭبەك جولىن باستاعان ول وسى اۆتوبازا جابىلعانشا تالماي ەڭبەك ەتتى. سودان كەيىنگى جىلداردا دا قاراپ وتىرماي، ءوز بەتىنشە سەمەيدەن قىتايدىڭ ءۇرىمشى قالاسىنا جانە استاناعا جۇك تاسىدى. 2011-جىلدان باستاپ جەكە تۇلعاعا جالدانىپ جۇمىس ىستەدى.
كۇندەردىڭ ءبىر كۇنى ءوزى ايداپ جۇرگەن Volvo كولىگىنىڭ يەسى وعان «مىنا كولىكتى ساتىپ الىپ، ءوزىڭ ءۇشىن جۇمىس ىستە، ال اراداعى كەلىسىمشارت سول كۇيى قالادى» دەپ ۇسىنىس جاسايدى. وتباسىمەن اقىلداسقان بورانباي مۇحيت ۇلى «دامۋ» كاسىپكەرلىكتى دامىتۋ قورىنا قايىرىلادى. «بيزنەستىڭ جول كارتاسى-2020» باعدارلاماسىندا جۇك تاسىمالى بيزنەسى - باسىم باعىتتاردىڭ ءبىرى ەدى، سوندىقتان «دامۋ» قورى الەۋەتتى كاسىپكەردىڭ ءوتىنىشىن جەرگە تاستامادى. وسىلايشا ساعاتوۆتار وتباسى جاقىن ارادا جەڭىلدىكپەن نەسيە الادى.
بۇگىندە بورانبەك ساعاتوۆ ۇنەمى جول ۇستىندە. ال ايەلى ءتۇلشان الداجار قىزى ىسكەرلىك قارىم-قاتىناستاردى رەتتەۋمەن ءوزى اينالىسادى. ويتكەنى بيزنەس سول كىسىنىڭ اتىنا جازىلعان.
«بۇگىندە «بەلاز» تراكتورلارىن اتىراۋدان اقتاۋعا جەتكىزۋ جونىندە «سەماز» جاۋاپكەرشىلىگى شەكتەۋلى سەرىكتەستىگىمەن كەلىسىمشارت جاساپ جاتىرمىن، - دەيدى ءتۇلشان ساعاتوۆا. - ءبىزدىڭ فۋراعا وسىنداي تراكتورلاردىڭ ۇشەۋى سيادى. كولىككە تۇسەر اۋىرلىق تا كوپ ەمەس. تاياۋدا قىتايعا ۆيزا راسىمدەدىك. «ەيكوس» ج ش س- مەن دوڭگەلەك جەتكىزۋ جايىن اقىلداسىپ شەشۋدەمىز. ءبىزدىڭ فۋرا قايتار جولدا بوس كەلمەس ءۇشىن della.kz سايتىنا تىركەلىپ، جولشىباي الا كەتەتىن جۇك ىزدەپ جاتىرمىن.
ونىڭ ايتۋىنشا، نەسيەنى جابۋدا ەش قيىندىق جوق. «نەسيەنى اي سايىن ۋاقتىلى تولەپ، بولاشاققا جاڭا جوسپارلار جاسايمىز. ەشقاشان كاسىپكەر بولام دەپ ويلاماپپىن. دەگەنمەن، ادام شىن قالاسا، نيەت ەتسە، الىنبايتىن اسۋ جوق ەكەن»، - دەيدى كاسىپكەرلەر وتباسى ءبىر اۋىزدان.
جانات قاپالبايەۆا
