الماتىدا جاڭادان سالىنىپ جاتقان مەترو بەكەتىنە باۋىرجان مومىش ۇلىنىڭ ەسىمىن بەرۋ كەرەك - ب. سماعۇل

الماتى. قازاقپارات- الماتىدا اباي داڭعىلىنىڭ بويىندا ب. مومىش ۇلى كوشەسىمەن قيىلىسار تۇستا جاڭادان سالىنىپ جاتقان مەترو بەكەتىنە باۋىرجان مومىش ۇلىنىڭ ەسىمىن بەرۋ كەرەك.

بۇل تۋرالى كەشە الماتىدا ب. مومىش ۇلى اتىنداعى رەسپۋبليكالىق اسكەري مەكتەپ- ينتەرناتىندا كەڭەس وداعىنىڭ باتىرى، قاحارمان قولباسشى باۋىرجان مومىش ۇلىنا ارنالعان ەسكەرتكىش-ءمۇسىننىڭ اشىلۋ سالتاناتىندا ق ر پارلامەنتى ءماجىلىسىنىڭ دەپۋتاتى، اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ ءتوراعاسى، اقىن باقىتبەك سماعۇل مالىمدەدى.

ونىڭ ايتۋىنشا، بۇل ۇسىنىس ەگەر وڭ شەشىمىن تابار بولسا، ۇلى جەڭىستىڭ 70 جىلدىعىنا وراي، باۋىرجان مومىش ۇلىنىڭ عانا ەمەس، سول سۇراپىل سوعىستا قان توككەن بارشا جاۋىنگەر اتا-بابالارىمىزدىڭ رۋحىنا جاسالعان زور قۇرمەت بولار ەدى.

«بۇل قادام سىرت كوزگە سەس، ال ۇرپاعىمىزعا ەس بولار ەدى. كەزىندە، 2010-جىلى حاليلا وماروۆ ەكەۋمىز «قازاقتىڭ باۋىرجانى» دەگەن دەرەكتى فيلمدى ءتۇسىرۋ ءۇشىن ماسكەۋگە بارعان كەزىمىزدە ۆولوكولامسك قالاسىنىڭ اكىمى ۆاسيلي شۋلەپوۆ: «ۇلى وتان سوعىسىندا ميلليونداعان جاۋىنگەر سوعىستى. ءبىراق، قازاق حالقىنىڭ قايسار رۋحتى ۇلدارىنىڭ ارقاسىندا فاشيستەر ماسكەۋدى باسىپ الا المادى»، - دەگەن بولاتىن. ماسكەۋدە «الماتى» مەترو بەكەتى بار، ال الماتىداعى جاڭا مەترو بەكەتتەرىنىڭ ءبىرى «ماسكەۋ» دەپ اتالدى. بۇل، ەكى ەل اراسىنداعى دوستىقتىڭ التىن كوپىرى ىسپەتتەس. سوندىقتان، دوستىقتىڭ شەكاراسىندا شەك بولماسىن، ارادا وتكەن وقيعالاردان كەك بولماسىن، ۇرپاق ساباقتاستىعى جالعاسسىن دەسەك، جاڭادان سالىنىپ جاتقان مەترو بەكەتىنە باۋىرجان مومىش ۇلىنىڭ ەسىمىن بەرگەن ءجون. بۇل ۇسىنىستى الماتى قالاسىنىڭ اكىمدىگى قۇپ كورەدى دەگەن ۇمىتتەمىن»، - دەدى ب. سماعۇل.

اۆتور: جاپپاربەرگەن ايبوتا