قازاقستان مەن قىرعىزستاننىڭ قۇقىق قورعاۋ ورگاندارى ىنتىماقتاستىق تۋرالى كەلىسىمگە قول قويدى
دالىرەك ايتقاندا، اتالعان ايماقتاردىڭ ىشكى ىستەر قىزمەتتەرى ەندى قىلمىسكەرلەردى ۇستاۋ، ەسىرتكى ساۋداسىنىڭ جولىن كەسۋ جانە ەكسترەميزم مەن تەرروريزم، زاڭسىز كوشى-قون سياقتى ماسەلەلەرگە قارسى بىرلەسىپ ارەكەت ەتپەك.
قوس تاراپ تالدىقورعاندا ىنتىماقتاستىق پەن بىرلەسكەن ءىس-قيمىل تۋرالى مامىلەگە قول قويدى. بۇل قۇجات ىشكى ىستەر مينيسترلەرىنىڭ كەلىسىمى اياسىندا جاسالىپ وتىر. سەبەبى، بيىلعى مامىر ايىندا ەكى ەل اراسىنداعى شەكارا اشىلعان بولاتىن. «سوندىقتان قوعامدىق قاۋىپسىزدىكتى قامتاماسىز ەتۋ وتە ماڭىزدى»، - دەيدى قۇقىق قورعاۋ سالاسىنىڭ باسشىلارى. كەلەسى كەزدەسۋ قىرعىزستاندا وتەدى. وندا الداعى بىرلەسىپ اتقاراتىن جۇمىستار جان-جاقتى تالقىلانادى دەپ جوسپارلانىپ وتىر.
«ءبىزدىڭ بۇگىنگى كەزدەسۋىمىزدى ءوزارا ىنتىماقتاستىق پەن بايلانىستار جايىنداعى العاشقى باسپالداق دەۋگە بولادى. وعان باسقارما باسشىلارى قاتىستى. ولار ءبىر-ءبىرىن سىرتتاي بىلەتىن. ەندى تانىستىق نىعايىپ، كەيبىر ماسەلەلەردى جەدەل شەشۋگە جول اشىلادى»، - دەدى الماتى وبلىستىق ءى ءى د باسشىسى مۇرات ۇرىمحانوۆ.
