ەبولا ۆيرۋسىنىڭ تارالۋى توقتاتىلدى

استانا. قازاقپارات - سەررا-لەونەدەگى ەبولا ۆيرۋسىنىڭ تارالۋىن توقتاتۋعا قول جەتكىزىلدى، دەپ ءمالىم ەتتى سەنبى كۇنى ر ف- نىڭ دەنساۋلىق ساقتاۋ مينيسترلىگىنىڭ رەسمي وكىلى ولەگ سالاگاي دۇينەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سىلتەمە جاساپ.

«بۇگىن د د س ۇ سەررا-لەونەدە ەبولا ۆيرۋسىنىڭ تارالۋى توقتاتىلعانىن جاريالادى. بەلگىلەنگەن ەپيدەميولوگيالىق تالاپتارعا سايكەس سوڭعى پاتسيەنت قايتا تەستىدەن وتكەنىنە 42 كۇن قاجەت. ەندى 2016-جىلدىڭ اقپانىنا دەيىن بۇل ەلدەگى اۋرۋدىڭ جاي-كۇيىنە تەرەڭدەتىلە باقىلاۋ جۇزەگە اسىرىلادى»، - دەدى سالاگاي.

ول باتىس افريكادا ەپيدەميا باستالعالى الەمدە ەبولا بەزگەگىنىڭ 28,6 مىڭنان استام فاكتىسى تىركەلگەنىن، 11,3 مىڭ ادام بۇل ىندەتتەن كوز جۇمعانىن ەسكە سالدى. رەسەي ەپيدەميا باستالعان كەزدە-اق زارداپ شەككەن ەلدەرگە كومەكتەسۋدىڭ بەلسەندى ارەكەتتەرىن قولعا الدى، ءتيىستى حالىقارالىق جوبالارعا قولداۋ جاسالدى، دەپ اتاپ ءوتتى سالاگاي.

«ىندەت باستالعان بويدا گۆينەيا رەسپۋبليكاسىنا جەتەكشى رەسپەيلىك ۆيرۋسولوگتار اتتاندىرىلدى. گۆينەيالىق ارىپتەستەرگە مەديتسينالىق جابدىقتار بەرىلدى، وسى ەلدە زەرتحانامەن جاراقتانعان ارنايى دارىگەرلەر بريگاداسى جۇمىس ىستەدى»، - دەدى ۆەدومستۆونىڭ رەسمي وكىلى.

ەبولامەن كۇرەستەگى بىرلەسكەن ءىس-قيمىل وسى جىلعى قازان ايىندا ماسكەۋدە بريكس ەلدەرى دەنساۋلىق ساقتاۋ مينيسترلەرىنىڭ كەزدەسۋى بارىسىندا تالقىلاندى، دەپ قوستى ول.