تاۋەلسىزدىك كۇنى تويلانباي تۇرىپ، جاڭا جىلعا ازىرلىككە كىرىسپەۋ كەرەك - «ميراس» قوعامدىق كەڭەسى

استانا. قازاقپارات - «نۇر وتان» پارتياسى جانىنداعى «ميراس» قوعامدىق كەڭەسى ەلىمىزدىڭ بارلىق وڭىرلەرىنە تاۋەلسىزدىك كۇنى مەرەكەسى وتپەيىنشە، جاڭا جىلعا ازىرلىككە كىرىسپەۋدى ۇسىنادى.

بۇل تۋرالى بۇگىن پارتيانىڭ باسپا ءسوز ورتالىعىندا وتكەن بريفينگتە «نۇر وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى بەرىك قۇرمانعالي مالىمدەدى. «ارينە، ءبىزدىڭ ەلىمىزدىڭ ەڭ باستى مەرەكە بۇل - تاۋەلسىزدىك كۇنى. ال جەلتوقسان ايىنىڭ 16 سىنا دەيىن جاڭا جىلعا دايىندىققا كىرىسپەۋ ماسەلەسى جىل سايىن تالقىلانىپ كەلەدى. سوڭعى ەكى- ءۇش جىلدا وڭتۇستىك قازاقستان وبلىسى وسىنداي باستامامەن شىققان بولاتىن، ونى باسقا وبلىستار دا قولدادى. ال پارتيا جانىنداعى «ميراس» قوعامدىق كەڭەسى جۇمىس ىستەيتىنى بەلگىلى، وسى كەڭەستىڭ مۇشەلەرىمەن بىرلەسە وتىرىپ، ءبىز ارنايى حات دايىنداپ جاتىرمىز. بۇل ماسەلەنى ءاربىر وبلىستىڭ ىشكى ساياسات باسقارمالارىنىڭ كومەگىمەن رەتتەۋگە بولادى»، - دەدى ب. قۇرمانعالي.

ونىڭ ايتۋىنشا، جاڭا جىلعا دايىندىققا تاۋەلسىزدىك كۇنىن مەرەكەلەمەي تۇرىپ كىرىسپەۋ تۋرالى مازمۇنداعى حات جاقىندا بارلىق ءوڭىردىڭ ىشكى ساياسات باسقارمالارىنا جولداناتىن بولادى.

اۆتور: قانات مامەتقازى ۇلى