استانادا پوليتسەي ومىرىنە قاۋىپ تونگەنىنە قاراماستان ىزدەۋدە جۇرگەن قىلمىسكەردى ۇستادى - كەسكىن

استانا. قازاقپارات - جول- پاترۋلدىك پوليتسيا پولكىنىڭ قىزمەتكەرى كولىك رولىندە ماس كۇيدە وتىرعان ەرەجە بۇزۋشىنى ۇستادى، دەپ حابارلادى استانا ءى ءى د باسپا ءسوز قىزمەتىنەن.

پوليتسيانىڭ اعا سەرجانتى باعلان قارىمبايەۆ شامامەن 17:00 دە «Lada Kalina»  ماركالى اۆتوموبيلدى توقتاتتى. ونىڭ جۇرگىزۋشىسى قارسى جولاققا شىعىپ كەتىپ، جولدا ءجۇرۋ ەرەجەسىن بۇزدى.

قۇجاتتاردى تەكسەرۋ كەزىندە جۇرگىزۋشى كولىكپەن ءىزىن سۋىتپاق بولعان. پوليتسيانىڭ اعا سەرجانتى ب. قارىمبايەۆ ورنىنان قوزعالعان كولىكتىڭ رولىنە جارماسىپ، جۇرگىزۋشىنى توقتاتپاق بولعان. جۇرگىزۋشى جىلدامدىقتى باسەڭدەتپەي، پوليتسەيمەن كەلەسى كوشە قيىلىسىنا دەيىن جەتتى. ومىرىنە تونگەن قاۋىپكە، الىنعان دەنە جاراقاتتارىنا قاراماستان، ءتارتىپ ساقشىسى زاڭ بۇزۋشىنى توقتاتتى.

مەديتسينالىق كۋالاندىرۋ ناتيجەسىندە جۇرگىزۋشىنىڭ ماس بولعانى انىقتالدى. ۇستالعان 38 جاستاعى قوستاناي وبلىسىنىڭ تۇرعىنى بۇرىن سوتتالعان جانە قىزىلوردا وبلىسىندا جاساعان قىلمىسى ءۇشىن ىزدەۋدە جۇرگەنى انىقتالدى.

ۇستالۋشى سوت سانكتسياسىمەن قاماۋعا الىندى. ق ر ق ك 380-بابى بويىنشا تەرگەۋ امالدارى جۇرگىزىلىپ جاتىر.

پوليتسيانىڭ اعا سەرجانتى باعلان قارىمبايەۆ مەديتسينالىق مەكەمەگە جەتكىزىلدى.