قىتاي ءبىرقاتار قازاقستاندىق اۋىلشارۋاشىلىق ونىمدەرىنە كەدەرگىلەردى جويدى - ب. ساعىنتايەۆ

بەيجىڭ. قازاقپارات - بۇگىن بەيجىڭدە ق ر مەن ق ح ر اراسىندا قازاقستاندىق اۋىلشارۋاشىلىق ونىمدەردى يمپورتتاۋدا كەدەرگىلەردى الىپ تاستاۋ بويىنشا كەلىسىمگە قول جەتكىزىلدى. بۇل تۋرالى ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ق ح ر مەملەكەتتىك كەڭەسىنىڭ ۆيتسە-پرەمەرى چجان گاوليمەن كەلىسسوزدەر جۇرگىزۋدىڭ قورىتىندىسىندا حابارلادى.

«بۇگىن بەيجىڭدە قىركۇيەكتىڭ باسىندا وتكەن قازاقستان پرەزيدەنتى نۇرسۇلتان نازاربايەۆ پەن ق ح ر ءتوراعاسى شي جينپيڭ كەلىسسوزدەرى كەزىندە قول جەتكىزىلگەن كەلىسىمدەردى جۇزەگە اسىرۋ بارىسىن قاراستىردىق. الدىمەن، بۇل «نۇرلى جول» باعدارلاماسىنىڭ «جىبەك جولىنىڭ ەكونوميكالىق بەلدەۋى» باستاماسىمەن ءتۇيىسۋى. ق ح ر- عا ءبىز جەتكىزەتىن ءونىم قۇنى تومەندەپ جاتىر. وسىعان بايلانىستى جىلدان جىلعا تاۋاراينالىم كولەمى ازايىپ جاتىر. ءبىز ەكسپورت ءۇشىن ماڭىزدى ءونىمنىڭ 20 ءتۇرىن انىقتادىق، ولاردى قىتايعا ەكسپورتتاۋ كولەمىن ارتتىرۋ ءۇشىن ق ح ر- دىڭ قولايلى جاعدايلار تۋعىزۋ مۇمكىندىگىن تالقىلادىق»، - دەدى ول قازاقستاندىق جۋرناليستەرگە بەرگەن سۇحباتىندا.

ونىڭ سوزىنە قاراعاندا، قازاقستان قىتايعا ءونىمنىڭ قوسىمشا 20 ءتۇرىن جەتكىزۋدى ۇسىندى. سونىڭ ىشىندە اۋىل شارۋاشىلىق تاۋارلارى بار.

«ەلباسىنىڭ ساپارىنان كەيىن قىتايلىق تاراپ ەلىمىزدەن ءبيداي جەتكىزۋگە قويىلعان ۇلكەن شەكتەۋلەردى الىپ تاستادى. بۇرىن ونى قاپپەن عانا جەتكىزە الاتىنبىز. بۇل، ارينە، جەتكىزۋ كولەمىن شەكتەيدى. بۇگىن قىتايلىق تاراپ بۇل شەكتەۋدى الدى»، - دەپ اتاپ ءوتتى ب. ساعىنتايەۆ.

ق ر پرەمەر-ءمينيسترىنىڭ ءبىرىنشى ورىنباسارى ق ح ر ق ر- دان جەتكىزىلەتىن سويا بۇرشاقتارىنا قاتىستى شەكتەۋلەردەن باس تارتقانىن اتاپ ءوتتى.

«ەندى مال شارۋاشىلىعى ءونىمىن جەتكىزۋدە قويىلعان كارانتيندىك شەكتەۋلەردى الۋ ماسەلەسىن كوتەردىك. ءبىز كوپ مولشەردە ءىرى قارا جانە قوي ەتىن ەكسپورتتاي الامىز. ەكىجاقتى ءتيىمدى كەلىسىمگە قول جەتكىزۋ ءۇشىن بۇگىن قىتايدىڭ ءتيىستى كارانتيندىك ورگاندارىنا ءبىزدىڭ مەملەكەتتىك ورگاندارمەن، سونىڭ ىشىندە اۋىل شارۋاشىلىعى مينيسترلىگىمەن جەدەل تۇردە ماسەلەنى جان-جاقتى قاراستىرۋ تاپسىرىلدى»، - دەدى ول.