ب. وباما اپاتقا ۇشىراعان رەسەيلىك ۇشاقتى لاڭكەستەر جارىپ جىبەرۋى مۇمكىن دەگەندى ايتتى
بۇل تۋرالى بۇگىن Reuters اگەنتتىگى حابارلادى.
«مەنىڭ پىكىرىمشە، ۇشاق بورتىندا جارىلعىش زات بولعان» دەيدى امەريكالىق كوشباسشى.
ا ق ش تاراپى ورىن العان وقيعانىڭ لاڭكەستىككە بايلانىستى دەگەن نۇسقاسىنا سەنەتىندىگىن مالىمدەدى جانە وقيعانى وزدەرى دە ءجىتى تەكسەرىپ كورمەكشى. ا ق ش پرەزيدەنتىنىڭ پىكىرىنشە، امەريكالىق بارلاۋ اپاتتىڭ ناقتى سەبەپتەرىن انىقتاي الادى.
ا ق ش اكىمدىگىنىڭ رەسمي وكىلى دجوش ەرنەست تە ۇشاقتى لاڭكەستەر اۋەدە جارىپ جىبەرگەن دەگەن پىكىردى قولدايتىنىن مالىمدەدى. «بىزدەگى قولدا بار مالىمەتتەرگە قارار بولساق تەرراكت فاكتىسىن جوققا شىعارا المايمىز» دەيدى ول.
دەگەنمەن، ا ق ش- تىڭ مەملەكەتتىك دەپارتامەنتى الدىن الا ناقتى پىكىر بىلدىرۋدەن باس تارتاتىنىن ايتتى. «ءبىز اپاتتىڭ سەبەپتەرى جايىندا وزدىگىمىزدەن پىكىر بىلدىرمەيمىز. مەن تەرگەۋدىڭ الدىنا ءتۇسىپ، وزدىگىمشە بولجام جاساي المايمىن، بارلىعىن دا تەرگەۋ اياقتالعاننان كەيىن بىلەتىن بولامىز» دەدى ۆەدومستۆونىڭ رەسمي وكىلى دجون كيربي.
ايتا كەتەيىك، ا321 ۇشاعىنا لاڭكەستىك شابۋىل جاسالعان دەگەن نۇسقانى ەڭ العاش بولىپ ۇلى بريتانيا پرەمەر-ءمينيسترىنىڭ كەڭسەسى 4- قاراشادا مالىمدەگەن بولاتىن.
اراعا ءبىر كۇن سالىپ ەگيپەتتىڭ ازاماتتىق اۆياتسيا مينيسترلىگى ناقتى دالەل بولماي ەشقانداي بولجام ايتۋدىڭ قاجەتى جوقتىعىن حابارلاعان ەدى. مينيسترلىك وكىلدەرىنىڭ مالىمدەۋىنشە، رەسەيلىك لاينەردىڭ اپاتقا ۇشىراۋىنا بايلانىستا بايانداما جاساۋعا 1-4 اپتا ۋاقىت كەتەدى.
ەستەرىڭىزگە سالايىق، 31- قازان كۇنى شارم-ءال-شەيحتەن سانكت-پەتەربورعا جول تارتقان «كوگالىماۆيا» كومپانياسىنىڭ Airbus A321 ۇشاعى سيناي تۇبەگىندە اپاتقا ۇشىراعان بولاتىن. ونىڭ بورتىندا بولعان 224 ادامنىڭ بارلىعى دا كوز جۇمدى.
Baq.kz
